Qaraqalpaq eliniń serxosh búlbúli,Tulparlar ishinde aǵla dúldili,Qádimiy Turannıń sahrayı gúli,Toylarıń múbárek, Ajiniyaz baba.

Sen xalqıńnıń mudam muńın tıńladıń,Jaw kelgende boztorǵay bop shırladıń,Sazǵa salıp «Bozataw»dı jırladıń,Xalqımnıń zibanı, Ajiniyaz baba.

Sheriyatta minsiz xızmetler ettiń,Ashıqlıq dástanın qaldırıp kettiń,Bul pániy dúnyadan ármanlı óttiń,Basıńdı bir kóter, Ájiniyaz baba.

Mákanıń gúllenip Boz otaw bolıp,Ele Jáyxun aǵar, Aralıń tolıp,Kóllerińnen úyrek ushıp, ǵaz qonıp,El Ziywarın esler, Ajiniyaz baba.

Bilim dárgayına ismiń qoyıldı,Atıń — altın, mármer tasqa oyıldı,Jáhán kórip qáddi-qáwmet boyıńdı,Toy-toyǵa ulasar, Ajiniyaz baba.

Qaraqalpaqta bir ziyalı bar dese,Shayırlıq sultanı — muńlı tar dese,Xalqı ushın dańq-abıroy, yar dese,Biz seni esleymiz, Ájiniyaz baba.