KÓRINER

Atqa qaysı tárepinen qarama,Dáslep quyrıq penen jalı kóriner.Qızdıń jańa jigit bolǵan balaǵa,Áwelha, bir qosha narı kóriner.

Biyqánáát at soydırar — jeyalmas,Qassap kátqudalıq tonın kiye almas,Iyt iyesin qapqan menen uyalmas,Sezimshil sol iyttiń sorı kóriner.

Qasqır kórdim demes, qashar soysań da,Barısqa báribir nashar soysań da,Shımshıqqa shokolad shashıp qoysań da,Kórinse kózine tarı kóriner.

Zor hámel, namaqul dáwlet-dáreje,Insapsızdı salar túrli bálege,Tákabbir, tawnazar, topas tórege,Móhminler adamnıń qorı kóriner.

Biri-eki bolıp, úshi-tórt bolsa,Mal-dúnya kán, dáwlet, pulı kóp bolsa,Tuwısqan kewlinde salqın lep bolsa,Sennen jaqın bolıp malı kóriner.

Alarda alıı az, berse bes ziyat,Alıp-satarlarda bolmas ar-uyat.Shobıtshıǵa satqan pıt-sıtı biraq,Óziniń kewline ǵalı kóriner.

Úlken hákim húkim aytar qısqasha...Sırǵıyanıń sózden isi basqasha,Aq kókirek adam awız jasqasa,Tisine qosılıp bári kóriner.

Abbaz bolıp aytalmasań sózińdi,Jolmurzaday jasap kórset ózińdi,Wa, janıwar ozǵan attıń kózinde,Jılqı janı, adam arı kóriner.

Haslı tulpar bolmay shappas uzaqqa,Kapirme, qurǵaq gáp jaqpas qulaqqa,Qaraqshı — qarawıl bolsa dozaqqa,Bárshe dozaqıylar urı kóriner.

Jaqsılardı jıǵıp berip jamanǵa,Qońsı qatın qız kóriner ladanǵa,Gúmanshıl, qızǵanshaq, ashkóz adamǵa,Ózgeniń kisesi tolı kóriner.

Dúnya — túlki, tazı emish adamlar,Yaqshı-yaman ótti neshshe zamanlar,Para alıp «qayta qurǵır» hámeldar,Qoy-qoranı baqqan «bóri» kóriner.

Oyınshısı, utaman dep jasaǵan,Ómir-utısı yoq, oyın qusaǵan,Hám «eki daw» alǵan emes hesh adam,Mázi «barsa kelmes» jolı kóriner.

— Dúnya — eski zatsań, jasań biymálel,Qánáát shúkirlik — dinim, iymanım,Nóker—bir besh kúnlik, múslim miymanıń—Ol hám óz páminiń qulı kóriner.