JAŃA ÓMIR

Dárya boldı shólistanıń,Gúldey boldı daǵıstanıń,Ata jurtı Túrkstanım,Jańa ómir kórdi búgin.

Jańa ómirli Túrkstan,Jaza bersem bolar dástan,Oyı-qırıń baǵı-bostan,Gúlge qoynıń toldı búgin.

Qara tasıń altın boldı,Shoyın hám metalǵa toldı,Oǵan xalqıń iye boldı,Barlıq mútáj pitti búgin.

Sırdáryadan Farhad GESi,Júdá qızıq ándiyshesi,Taza ilim texnikası,Islep atır sizde búgin.

Suw jetkerdi shólistanǵa,Jaqtı berdi daǵıstanǵa,Hámme jeriń gúlistanǵa,Ser salsań aylandı búgin.

Tawıń da baǵ, jeriń de baǵ,Dúnya júzine jetti dańq,Hámme jerińe toldı xalıq,Jaynap-jasnap ósti búgin.

Tariyxta sen tanıs ediń,Burın bizge alıs ediń,Shuwaq túspegen qıs ediń,Jaynaǵan jaz boldıń búgin.

Ortańnan poezd ótip tur,Álemge dańqıń ketip tur,Aspanǵa qolıń jetip tur,Maqset etip sozsań búgin.