Bolǵan deydi bir awıldıń tulparı,Qayshı qulaq, kókiregi arıstay.Ózi ábden alıs joldıń inkarı,Shabatuǵın ushqan qustan qalıspay.
Dábdebeli toy bolıptı bir kúni,Tulpar bolsa bas báygige qosılǵan.Ayırıp ótip júyriklerdiń dúrkinin,Kóz tiygendey súrnigipti tosınnan.
Sóytip tulpar qápelimde qulaǵan,Qara jerdi bawırına dastanıp.Jatqanında tap adamday jılaǵan,Jawtań kózden monshaq-monshaq jas tamıp.
Sonnan baslap tura bergen baylawda,Janıwarıń erkinlikten ayrılıp.Ol tuwralı ayanıshlı oylaw da,Qalǵannan soń doynaǵınan mayrılıp.
Ol báygini umıtpadı biraq ta,Naáylajlıqtan qalǵan menen irkilip.Esitilgende at dúbiri qulaqqa,Oqıranar ózi dúr-dúr silkinip.
Ótip ketken eń baxıtlı gezleri,Qayta-qayta oralıptı oyına.Taqat tappay turǵanın da sezbedi,Mol jigerdiń darıǵanın boyına.
Bul awhaldı sezip-bilgen uǵadı,Waqıyanıń aytar bolsam shınlıǵın:Naǵız tulpar tawsılǵanda shıdamı,Pıtırlatıp úzer eken shılbırın!
***
Lira — gúz payıtında tatlı sırlasım...Jıllardıń dizbegin ertip izine.Bıyıl da gúzetip ǵazın, tırnasın,Mine, kelip qaldı ómir Guúzi de.
Ańsaǵan paytında hárgiz tabılmay,Doslardıń diydarı dilgir etedi.Awır bir filmniń lentalarınday,Olar kóz aldımnan bir-bir ótedi.
Sezim tebirenbese, siyneń sógilmes,Janımda joq ózim unatqan qız da.Kóz jası tógilmes, kózge kórinbes,Aylanıp ketkendey aqqan juldızǵa.
Nelerge dash bermes adam balası?!…Ayrılıp qaldım da Qádirdanımnan —Jigerim, kózimniń aǵıw-qarası,Jer-kókten taptırmas. Bar ma tabılǵan?!...
Waqıt rehimsiz — bermes qol ushın,Alıs qalǵan ómir báhári derler.Óter Gúz. Kimnińdur tógip tolısın,Onı — Ayralıqlar máháli derler…
***
Men — bir meteorit árman tiyegen,Bul ómirge asa qushtarlıqtan ba?Ya sońınan qarlı qıs barlıqtan ba? —Gúzdi súyemen.
Men — bir meteorit árman tiyegen,Jıllardı janıńda irke almaysań,Irke almaǵan soń máńgi qalmaysań,Gúzdi súyemen.
Men — meteorit árman tiyegen,Ushar tuńǵıyıqqa hár kún — hár tasım,Ótip baratırman ómir ortasın,Gúzdi súyemen.
Men — bir meteorit árman tiyegen,Biri pitken menen mıńı pitpeydi,Aǵıp baratırman. Jollar kútpeydi! —Gúzdi súyemen.
Men — bir meteorit árman tiyegen,Pursat barlıqtan ba ele az ǵana? —Ómirimdi máńgilik ara sozbaǵa,Gúzdi súyemen.