Ata jurtı Túrkstannan kelgeli,Ata-babam qonıs basqan jaylawım.Anadan tuwǵalı, esti bilgeli,Qatar menen oynap-ósken jaylawım.

Kún boyına bayır etip turaqlı,Men ketermen, árman menen jıraqlı,Qamıs orǵan altaw-jetew, oraqlı,Teris tóbe, Uzın qayır jaylawım.

Ólim xabarınan kelmegey saza,Endi aytayın sózdi amanlıq taza,Erjan ataw menen shıǵısı «Írza», –Teńizlerde awqat etken jaylawım.

Balıq awlap Toqtas, Mantik boyınan,Balıq shanshıp jazda júrgen oyınnan,Shanshıp saylap júrip jayın moynınan,Ata-babam awqat etken jaylawım.

Ábdimurat molla, Ibrayım menen,Jáne qaptalında Izmurat gereń,Qıtay, Qońırat hám de qalıń el menen, –Ata-babam awqat etken jaylawım.

Alasat tabılsa, barlıq el kósher,Kóbeyip tur aramızdan qan isher,«Jetim – jılay, ılaq – mańray kún kesher»Árman menen júrmen men de jaylawım.

Jaylawım Jalayır, Kópir hám «Aqbóget»,Suw keler me degen bizde bar úmit!Shaqaq urar aqır bir kún qız-jigit,Árman bilen qayǵıda ósken jaylawım.

Áwelha óskenim Kók ózek boyı,Adamnıń jeterme shuǵılǵa oyı,Puqaranıń taymaǵaylar baq-kúyi,Arzıw árman bilen ósken jaylawım.

Qızlar menen suhbet etip bilgenshe,Doslıq, mehribanlıq etip ólgenshe,«Sen arman tur, men berman tur» degenshe,Arzıw árman bilen ósken jaylawım.

Bekman shaǵıl, Jańa suwdıń boyları,Sharqırawıq «Múyten» bóget jayları,Jayılǵan baylardıń sansız qoyları,Kózime totıya júrgen jaylawım.

Kól saǵa, Ayırsha, Terbenbes teńiz,Ásirese, Ayırshada óskenbiz,Birikkende kókeylerin keskenbizÁrman bilen ayra túsken jaylawım.