QÁLBIYKE

Qońırattaǵı «Qallikóldiń» dalası,Qalıń toǵay torańǵıldıń arası,«Súwenli»niń qubla betki jaǵası,Seniń tuwılǵan jeriń edi, Qálbiyke.

Kórdim seniń mıńsan ǵana muıńıńdı,Kórdim seniń ótken qara túnińdi,Kórdim seniń, keskenińde tulımdı,Óytkeni men birge óstim, Qálbiyke.

Kózden jasıń monshaq-monshaq aqqanı,Kewil kiriń qabat-qabat qatqanı,Kishkentayda qara jılan shaqqanı,Meniń ele yadımda ol, Qálbiyke.

Ixtıyarıń ketip seniń basıńnan,Malǵa satıp ákeń seni jasıńnan,Mańlayıńa qara tamǵa basılǵan,Qara kúnler yadımda ǵoy, Qálbiyke.

Awıl jıraq, jollar edi bir qıya,lqtıyar dep jazǵan waqta bir sıya,Erik alǵanda Qanım, Qaljan, Urqıya,Men qalaǵa ketip edim, Qalbiyke.

Bilim alıp oqıp, islep qalada,Shıǵa almadım qol jetisip dalaǵa,Biraz waqıt ótti usı arada,Kórmegeli kóp kún bolǵan, Qálbiyke.

Ótken jazda awıl betke barǵanda,Átirapqa kózdi tegis salǵanda,Usaydı awıl ózgerilip qalǵanǵa,Jańa awıl jańalanǵan, Qálbiyke.

Jańarǵan jer «Qallikól»diń dalası,Gúlge oranǵan «Súwenli»niń jaǵası,Gúl taǵılǵan gedey, batraq balası,Awıl bunday bolǵan eken, Qálbiyke.

Awıl házir kórinedi kóz tartıp,Mol tabısı tawdan aqqan bulaqtay,Tawda bolsa jıǵatuǵın shıdatpay,Awıl sonday pátke mingen, Qálbiyke.

Ayta bersem awıldaǵı oljanı,Sanay bersem tabıslardı qoldaǵı,Gúlláni de usı az jılda bolǵanı,Burın bizde barmedi ol, Qálbiyke?

Million tabıs taǵı-taǵı tabamız,Keleshektiń shamshıraǵın jaǵamız,Mine, alǵa pátli ketip baramız,Pátli kiris sen de iske, Qálbiyke.