Saǵıydulla Abbazov — balalar shayırı.

S. Abbazov 1930-jılı 5-mayda Taxtakópir rayonında belgili xalıq shayırı A. Dabılovtıń shańaraǵında tuwılǵan. Ol 1947-jılı Tórtkúldegi awıl xojalıq texnikumın pitkerip Qaraqalpaq mámleketlik pedinstitutınıń qaraqalpaq tili hám ádebiyatı bólimine oqıwǵa kiredi hám onı 1952-jılı tamamlaydı.
    S. Abbazov 1952-1957-jılları “Jas Leninshi” gazetasında kórkem ádebiyat bólimin basqaradı. Sońınan (1958-1964) “Jetkinshek” gazetasınıń juwaplı xatkeri, (1964-66) Tashkenttegi joqarı partiya mektebinde oqıydı, 1966-1976-jılları “Qaraqalpaqstan” baspasında kórkem ádebiyat bóliminiń baslıǵı, bas redaktor (1966-1976) lawazımlarında isledi. 1976-1985-jılları Qaraqalpaqstan televideniesi hám radio esittiriw Komitetinde aǵa redaktor, bas redaktor, Komitet baslıǵınıń orınbasarı, 1985-jıldan ómiriniń aqırına shekem “Qaraqalpaqstan” baspasınıń bas redaktorı boldı.

    S. Abbazovtıń dáslepki shıǵarmaları 50-jıllardan baslap baspa sózde kórindi. Ol balalar hám jas óspirimler ushın kóp ǵana shıǵarmalar dóretti. Onıń “Sırlı albom” (1962), “Meniń inim” (1964), “Kel, báhárim!” (1967), “Quslar qaytıp keledi eken” (1968), “Mektepte de, úyde de” (1977), “Mektepte bayram” (1987) sıyaqlı toplamları hám tańlamalı shıǵarmalarınan ibarat bir tomlıǵı jarıq kórdi.
S. Abbazov K. Chukovskiy, S. Mixalkov, A. Barto, Q. Muxammadiy, G.Georgievtiń bir qatar shıǵarmaların qaraqalpaq tiline awdardı. Shayırdıń “Timurovcı Arala” (1976) degen kitabı rus tilinde de basılıp shıqtı. Onıń bir qatar shıǵarmaları basqa tillerge de awdarılǵan, namaǵa túsirilgen qosıqları da bar.

    S. Abbazov 1982-jıldan Jazıwshılar awqamınıń aǵzası.