Geybirewdiń kewli ósik,Ózgeni kózge ilmeydi.Ózin-ózi kótermelep,Tamaǵın kernep sóyleydi.

Kóterip murnın aspanǵa,Óz siynesin kórmeydi.Birew aytsa kemshiligin,Dúzeteyin demeydi.

«Júrmel»ge minip sol kúni,Qızara bórtip terleydi.Tawdaǵı marqa kiyiktey,Tum-tusqa qol sermeydi.

Kóshe boylap shaljańlap,Dúbeleydey órleydi.Erksiz aǵashlardı súzip,Óz erkine júrmeydi.

Bir adamdı kóre qoysa,Bekkem uslap jibermeydi.Meni óziń bileseń, — dep,Kópiredi, sóz bermeydi.

Isleyin dese bir isti,Ishkilik erk bermeydi.Bes kúnde úsh kún awırıp,Jumısqa dım kelmeydi.

Kele qoysa keńsege,Aqqan suwday gúwleydi.Anekdot aytıp kópirip,Ózin maqtap jóneydi.

Bunıńday «bilgish» ózgeniń,Óskenlerin kúnleydi.Súrgeni «jorǵa» bolǵan soń,Óz ayıbın sezbeydi.

Úrdis etip ishpeń araq,Araqtan payda kelmeydi.Ómirge zıyan keyni zar,Awırsań dińkeń enbeydi.

Ómirge keler payda joq.Kóp sóylewden maqtanıp.Retli sóylep, ádepli bol,Tártipsiz isten saqlanıp.