QUYASH PENEN SÍRLASÍW

Quyash, sen ózińdi jasırtpa bultqa,Júziń tasalama nuranı kózden.Qansha qımbatıńdı bul duyım jurtqa,Bulttan shıqqan waqlıq paytıńnan izlen?!…

Durıs, kóp mushları jer anamızdıń,Seni qádir túndey kútedi uzaq.Kútkendey jigitin ezilip qızdıńYaki qırǵawılǵa qurǵanday duzaq.

Kútedi, al, usı kútiwler meni,Meni jep baradı, jonılǵan saptay.Sholpan batıw menen kútkishlep seni— Bul ne, ketken joq pa búgin tań atpay? —

Degenniń esabı esapsız bizde,Jetedi keshegi bult bergen ǵapıl.Qozıday shapqılap úyrengen dúzde,Quyash ballarına kerekseń, aqır!...

Bilmedim, negedur, ashıq háwespenQáleymen mudamı jadırawıńdı.Kórip kiyatırman, ketpeyseń esten,Sheshken kúnnen beri besik bawımdı.

Súrinip-qamılıp, juwırıp-jortıp,Astıńda júrippen, bolǵıl kózqulaq.Anaw, narkotikke júrgenler bórtip,Seniń bahań menen sanassın biraq...

Quyash, oh, quyashım, nurlı quyashım!Sensiz waqıt isik qabaq qız taqılet.Qırmızı qız kibi kúlseń, ırasım,Dúnyada bolmayjaq zárre hám ǵáplet.

Dúnyada bolmayjaq ǵam-ǵussa reń,Bolmayjaq dúnyada shadlıqtan basqa.Sen ayt, sá reńler tartama gúreń,Seniń baqqanıńdı túsinse tasqa...

Turmıstıń tursı zań, bul zań aqırı,Alıp júre alǵanǵa mazmunı maqul.Mıńsan shaqırımnan alıp aqılım,— Birge kúleyik, — dep bálentke shaqır.

Bizge bir nur tek te ózgeshe parlap,Ot bolıp «muz kewil» áwladın erit!Men hám óz qálbimde ózgeshe parlap,Sennen alǵanımdı keteyin berip.