1915–1990
Tilewbergen Jumamuratov — belgili xalıq shayırı.
T. Jumamuratov 1915-jılı 27-dekabrde Moynaq rayonınıń Aqdárya awılında tuwılǵan.
1937-jılı muǵallimler tayarlaytuǵın bir jıllıq kurstı pitkerip, óz awılında muǵallim bolıp isleydi. 1942-45-jılları Moynaq rayonlıq gazetasında redaktor lawazımında, 1945-49-jılları rayonlıq partiya komitetinde isledi. 1948-jılı Tashkent mámleketlik universitetin sırttan oqıp pitkerdi. 1951-52-jılları “Sovet Qaraqalpaqstanı” gazetasında, 1952-58-jılları radiokomitette, 1958-61-jılları “Ámiwdárya” jurnalında bólim baslıǵı, “Qaraqalpaqstan” baspasında (1961-62), Jazıwshılar awqamında juwaplı xızmetlerde (1963-81) jumıs isledi.
T. Jumamuratovtıń birinshi qosıǵı 1937-jılı jarıqqa shıqtı. Shayırdıń “Júrek muxabbatı” (1956), “Doslıq” (1959), “Meniń zamanlaslarım”(1963), «Káramatlı tulǵa” (1975), “Tolqında”(1970) toplamlarınan keyin “Tańlamalı shıǵarmaları”(1967), 1978-82-jılları Shıǵarmalarınıń 2 tomlıǵı, “Túrli ótkeller” (1983), “Doslıq xaqqında qosıqlar”(1988), “Ómirińniń ózi filosofiya” (2005) toplamları baspadan shıqtı. Shayırdıń “Makarya sulıw” poeması 1973, 1975-jılları qaraqalpaq tilinde basıldı.
Shayırdıń kóplegen poeziyalıq shıǵarmaları, sońday-aq “Makarya sulıw” poeması rus, ózbek tillerine awdarıldı.
T. Jumamuratovtıń “Qızlar házili” (1976), “Tiklengen tuw” (1971) pesaları teatr sahnasında qoyılǵan.
Shayır “Tolqında” toplamı ushın Qaraqalpaqstan Respublikası Berdaq atındaǵı mámleketlik sıylıǵınıń laureatı boldı (1972). Ol tuwısqan xalıqlar poeziyasınan Omar Xayyam, Á.Nawayı, Ǵ.Tokay, Muwsa Jálil, A.Pushkin shıǵarmaların awlarıwǵa qatnastı.
T. Jumamuratov “Qaraqalpaqstan xalıq shayırı” (1957), “Ózbekstan xalıq shayırı” (1969) húrmetli ataqlarına miyasar boldı. Qaraqalpaq ádebiyatı tarawındaǵı miyneti ushın “Xalıqlar doslıǵı”, “Húrmet belgisi” ordenleri, medalları sońday-aq Ózbekstan, Qaraqalpaqstan hám Bashqurtstan Respubliqaları Joqarǵı Keńesleriniń Xúrmet jarlıqları menen sıylıqlanǵan.
T. Jumamuratov 1957-jıldan Jazıwshılar awqamınıń aǵzası.