ADA BOLMAS DÁSTANÍ

Mańızı zor elge etken xızmettiń,Mártler ayasında húrmet-izzettiń.Kúndey bolıp elesleydi jan úlkem,Terbetilip besiginde lázzettiń.

Almas qılısh tek jatpaydı qınında,Márt maydanda belli bolar shınında.Jıl boyına etken istiń salmaǵı,Ólshenedi bir mártebe jılında.

Tabıs artqan eldiń bálentdur qolı,Xalqı shad, aspanı dúrkin qus jolı. JQaraqum, Qızılqum eki arası,Túrli kán — tawsılmas tabısqa tolı.

Ústirtinde neft, túrli kánler bar,Bunday úlke basqa jerde shende bar.Mańlay terler nurǵa aylanǵan jerimnen,Adamǵa ne kerek — bári tabılar.

Temir jol kánleri Ustirt dalası,Dárbent boldı Xojeliniń qalası.Jaqın boldı poezd penen júrgende,Moskva, Nókis hám Tashkent arası.

Baǵ-baqshalar miywalarǵa malındı,Jan úlkemnen túrli baylıq tabıldı.Qolǵa kirgizdik, dep úlken tabıstı,Bahadırlar qaǵar bárha dabıldı.

Bahadırlar bir-birinen kem emes,Júk kóterse, júgim awır der emes.Hárbiriniń basıp ótken jolında,Batırlıqtıń nıshanınan bar eles.

Pánje salsa, som temirdi búkkendey,Bulttı tútip, suwın jerge tókkendey.Batırlardıń hámirinen BestóbeNe bir tawlar jer bawırlap shókkendey.

Tań qaldırǵan tabısları basqanı,El shadlansa, dáwletiniń tasqanı.Ne bir shayır neshshe jıllap jazsa da,Ada bolmas Qaraqalpaq dástanı.