1898–1970
Abbaz Dabılov — belgili xalıq shayırı.
A. Dabılov XX ásirdegi qaraqalpaq poeziyasınıń rawajlanıwına ayrıqsha úles qosqan talantlı sóz sheberi. Shayırdıń dóretiwshiliginde xalıq awızeki poeziyasınıń, ádebiyatmızdıń hám shıǵıs ádebiyatınıń eń jaqsı dástúrleri óziniń kórkemlik birikpesin taptı.
A. Dabılov 1898-jılı Taxtakópir rayonınıń Qaraoy awılında tuwılǵan. Ol medresede oqıp sawatın ashqan, óz dáwiriniń sawatlı adamlarınıń biri boldı. Usıǵan baylanıslı ol bir qansha waqıt kuwdalawǵa da túsken. 20-jıllardıń ortalarında jańa uyımlasqan jámáátlik xojalıqqa kiredi, jámáát basqarmasına aǵzalıqqa saylanadı.
1939-jılı A.Dabılov Tórtkúlge tartıladı hám ol jerde dóretiwshilik jumıs penen birotala shuǵıllanıwǵa imkaniyat aladı, usı jılı Tashkent, Moskva qalalarına ekskursiyaǵa jiberiledi.
A. Dabılov Qaraqalpaq ádebiyatınıń hár bir dáwirinde óziniń ájayıp shıǵarmaları menen belgili boldı. Shayırdıń “Qosıqlar” (1940), “Jeńisler yoshı” (1947), “Alǵa” (1959), “Qosıqlar” (1962), “Júrekke jaqın adamlar” (1965) «Arnaw» (1966) «Temir jol» (1973) «Námárt jigit nege dárkar” (1976) hám basqa da toplamları basılıp shıqtı. 1950-195-jılları “Baxadır” dástanı basıldı. Shayırdıń kópshilik shıǵarmaların óz ishine alǵan 1,2,3 tomları (1958,1967,1972) basıldı.
Abbaz shayırdıń kóp ǵana qosıqları ózbek, rus hám qazaq tillerine awdarılıp, toplam bolıp basılǵan. “Baxadır” dástanı 1990-jılı tolıq túrinde rus tilinde jarıq kórdi.
Abbaz shayırǵa “Bahadır” dástanı ushın Qaraqalpaqstan Respublikasınıń Berdaq atındaǵı mámleketlik sıylıǵı berildi (1990). Ol “Qaraqalpaqstan xalıq shayırı” (1967) hám “Ózbekstan xalıq jırshısı” (1945) edi.
A. Dabılov 1957-jıldan Jazıwshılar awqamınıń aǵzası.