JEŃGEN JAQSÍ

Jolıń bolsın, bar azamat,Barıń, jawdı jeńgen jaqsı.Bizge islegen qıyanet,Dushpan otı sóngen jaqsı.

Qayırlı bolsın qádemiń,Kóp oylańız xalıqtıń ǵamın,Isinen hárbir adamnıń,Bir nátiyje óngen jaqsı.

Tuwrı jol menen jır tolıq,Bolmasın hesh námártshilik,Watan ushın qıyınshılıq,Basqa kelse kóngen jaqsı.

Jawdı jeńiw erler menen,Hasıl ónim jerler menen,Hám til menen hám qol menen,Qaytpas wáde bergen jaqsı.

Tabaqqa qol saldırǵansha,Jalǵız tilin aldırǵansha,Dushpanlarǵa jol bergenshe,Watan ushın ólgen jaqsı.

Dushpanlar háddinen assa,Júrer jolınan adassa,Biziń jerge ayaq bassa,Tabanınan tilgen jaqsı.

Ayrılǵansha gúl mákannan,Tayaq jegenshe bótennen,Watandı taslap ketkennen,Iytler yańlı úrgen jaqsı.

Dushpannan zorlıq kórgennen,Qayǵılı dáwran súrgennen,Bir taban jerdi bergennen,Qara jerge kirgen jaqsı.

Dushpanlardı jeńip shıǵıp,Ókpesine nayza suǵıp.Nur jaynaǵan jazǵa shıǵıp,Minsiz dáwran súrgen jaqsı.

Salıp minaqqas jaylardı,Keńnen tutıp saraylardı,Qoy ústinde torǵaylardı,Jumalatıp júrgen jaqsı.

Ánjir, alma, ánar, badam,Baǵda sayratıp dembe-dem,Óz miywesin hárbir adam,Baǵ ishinde tergen jaqsı.

Miyrimsiz bolıp dushpanǵa,Ushırıp kúlin aspanǵa,Shıq juqtırmay gúlistanǵa,Jawdı nıpqırt etken jaqsı.