Qurı ǵana jılııratıp túslerin,Bejere almay qolǵa alǵan islerin,Parazittey jumsamaǵan kúshlerin,Zil qaratas haram tamaq sol jaman.

Shın berilip bir ǵana is etpegen,Miynet dese «bas awırtpa, ket» degen,Bir tapqanı bir tapqanǵa jetpegen,Is qosjaqpas jalqaw degen at jaman.

Jigerli jas qatarına sanalmay,Kózge túsip, kóp ishine baralmay,Birge islesip kópten payın alalmay,Bárinen de bosqa qalǵan sol jaman.

Tıp-tınısh arqayın paraxatlanǵan,Kótermelep ózin badabatlaǵan,Bolar bolmas iske marapatlanǵan,Jónsiz qurı maqtanshaqlıq sol jaman.

Haram oylı, ishi qara kómirdey,Topıraqta shirip qalǵan temirdey,Júzi ábeshiy, túsi suwıq ólimdey,Adamgerlik arın satqan sol jaman.