Kórindi

Bul dúnya qurısın, kóz jetpes jeriń,Aytıwga til jetip, tarqamas sheriń,Ashlıqtıń azabın kórdiler elim,Jer beti ayaday maǵan kórindi.

Jarǵanat júr, ústi qızıl, pári joq,Tamaq tabar tıq-tıqtayın kári joq,Suwıqta júrerge anıń halı joq,Jaz kúnleri qıstay bolıp kórindi.

Jorǵa-júrmel, tulpar kibi júyrikler,Adamzatqa shad bolǵanda kerekler.Baǵı hárem, baqsha hámde terekler,Kózlerime sheńgel shelli kórindi.

Halıp bilmey, zikir aytıp "allalar",Adamlardı aldap bárha ollalar,Suwpı, iyshan, axun jáne mollalar,Kózlerime shaytan yańlı kórindi.

Bul dúnya tarıldı – álamat boldı,Kórmedi dumannan móhminler joldı.Bizden burın neshe zamanlar boldı,Ótken dúnya bir pul shelli kórindi.

Adamǵa miyrimsiz jálladlar, jawlar,Xalıqtı jılatqan atalıq, xanlar.Basqa awır qayǵı salǵan zalımlarKózlerime shayan-jılan kórindi.

Kórindi-kórindi ózimdey ǵariyp,Aqsha júzi solǵın tartıp sarǵayıp,Aǵalar, bul isti kórmeńler ayıp,Bárshesi kózime yalǵan kórindi.

Duman tarqap, kúnniń kózi kórinse,Jorǵa mingen ombasına súrinse,Baxıt anıq kelip túsime ense,Bir jasım on jasqa tarır kórindi.

Dúnya deseń, qara jumbay kózińdi,Zulmatları otqa jaǵar ózińdi,Pátiwasız eter zalım sózińdi,Zaman maǵan zindan kibi kórindi.

Ádalat joq, begi, patsha xanlarda,Xosh kewil joq ǵarip paqır insanda,Bizler shıqqan bul wapasız dúnyada,Hárbiri kózime yalǵan kórindi.

Kórindi bul dúnya azdur wapası,Kewlimniń ketpeydi jábriw-japası,Haq bolmasa bendesiniń panası,Bolmasa bul dúnya hayran kórindi.

Dúnyası qurısın qazan urǵanday,Jasawıllar nayza alıp turǵanday,Qara basqa aqır zaman qurǵanday.Zaman maǵan qara duman kórindi.

Mahiytaban emes, Májnún kórindi,Shapqan atım arıqlıqtan súrindi,Kem-kemnen ańlanar sózlerim endiBárshesi dúnyanıń yalǵan kórindi.

Bul dúnya kerekdur ólgenshe, bende,Azaplar shegemen zalımnan kúnde.Janım aman júrse bul shiyrin tánde.Zalımlardıń isi finhan kórindi.

Oylan Berdimurat, zaman tarıldı,Sumlıǵınan júrekgenem jarıldı,Men sorlınıń jolı jaman tarıldı,Bul zamannıń túri jaman kórindi.

Oylan adam, oylan, dúnya hálekti,Qayǵı-ǵam astında ezbeń júrekti,Erkime qoy, bermeseń de tilekti,Bul basıma aqır zaman kórindi.

Men nalıyman, zamanım tur tarılıp,Jarımadıq islesek te sarılıp,Jermenler joǵalsa qarnı jarılıp,Degen tilek doslarımda kórindi.

Oylan Berdimurat, qısqart sózińdi,Qısqartpasań topıraq basar júzińdi,Besh kúnlik dúnyaǵa aqır izindeJamalıń bir saat miyman kórindi.