BAXTÍMSAŃ

Kóz jumıp dúnyadan jalǵız ótemen,Kúydirer kúymegen bawırımdı ótinish.Sen ishken antlardan janıp ketemen,«Ah» sheger kóksimde júrek natınısh.

Qızǵanısh hár bále jawdırdı basqa,Sen kelseń bul jismim aylanar tasqa,Ne ushın bir ómir jolımız basqa,Kelmeseń kózlerim ǵarq bolar jasqa.

Nawqıran basımnan shashpas gúz qazan,Túsinse kewlimdi gıllegen báhár.Iyeler óziń joq bul úydi hijran,Qara kózlerime sıymaydı jáhán.

«Óziń kel, janım» dep qıynama meni,Sensiz bul dúnyadan jalǵız ótemen.Otlı qıyalıńnan quyashtay sónip,Bir ómir dártińnen janıp ketemen.

Júrek buyrıǵınan shetley almaymız,Heshkimge bergisiz baxtıń edi ǵoy.Ajıralıp hám bizler ajırasa almaymız,«Kelmeymen dep jáne izlep keldiń ǵoy.

***

Júrekke bul soqqı neniń inamı,Kewil jılaydı dep oylamadıń ba?Durıs, ápiw etiw múmkin gúnanı,Jaqsılıqtıń janın qıynamadıń ba?

Soǵan isendiń be, ótti jábiriń,Qálbim gór, tilim lal, tuyǵılarım tul.Juldızlar — aspanǵa shashılǵan háwirim,Waqıt bizdi ózine etedurlar qul.