Qobız

Jańla qobız, ásirlerdiń gúwası,Qaraqalpaq sazlarınıń saǵası.Qaytqan ǵazday ǵańqıldaǵan únińeShadlıq quyǵan jańa zaman dúnyası.

Kemseńletip ǵarrılardıń iyegin,«Posqan eldi» tolǵap ótken Jiyeniń.Ásirlerdiń awır sherin arqalap,Tuqılı ashıp, jawır bolǵan tiyegiń.

«Kelte ziban» gúrmewińe kelmedi,«Ullı ziban» baxıt tappay shólledi.«Jortıwlıda» eldiń joǵın joqlaǵanBatırlardıń at tuyaǵın serledim;

«Sherbeyitiń» sherli janday ah urıp,«Kóz aydınıń» quwanıshqa shaqırıp,Xalıq ǵázebi tolıp tassa, sendaǵı,«Ayǵa shaptıń» arıslanday aqırıp.

Sen diyqannıń qulaǵınan shań qaqtıń,Shopan menen Qızıl qumda qoy baqtıń.Sen bayanlap keldiń árman-tileginXan ermegi bolǵan qaraqalpaqtıń.

Sazdan tulpar, tiyegińnen er ettiń,Qıyalıńnan qas batırlar dórettiń.Xalıq baxıtı dep atlandırıp olardı,Sarkop penen Baysın elin izlettiń.

Kún astında Sarkop, Baysın kóp edi,Bárinde de baylar ǵana toq edi.Miynetkesh xalıq baxıtı ushın «boz torǵay-Qoy ústine awnaǵan» el joq edi.

Máńgi baxıt ornap tuwǵan elinde,Taza lapız aldı seniń úniń de.Shadlıq jırın tolǵap Qıyas, Qurbanbay,Jańa turmıs saxnasında kórindi.

Xalıqtıń altın ǵáziynesin qolǵa alıp,Ǵarrı jıraw qıya shólde tolǵanıp,Alıp shıǵıp ásirlerdiń shańınan,Jańa áwladqa miyras etti quwanıp.

Jańla qobız, sol tapsırǵan miyrasıńXalıq ómiriniń shejiresi, aynası,Búgin bizge járdemleser jalıqbayGúllentiwde jańa turmıs dúnyasın.