Jigit bolsań xalıq isine taq turar,Awır júkti óz moynıńa art jaqsı.Óriste mıń qoydı bir serke baslar,Dártiń bolsa el jılawın tart jaqsı.

Tutpaq kerek babalardıń aqılın,«Atıń sońǵa qalsın» degen naqılın,Saylap tutıń jigittiń de hasılın,Bir wádeden dónbeytuǵın márt jaqsı.

Márt penen jolǵa shıq ortada talma,Kewildegin isle degenge bolma,Aqılıń bolsa azǵa qanaat qılma,Oylap qara eki-úshten tórt jaqsı.

Aıńsatınan basla qolayın kórip,Qaytıp dónbe orta jolda bel berip,Moynı uzaqtıń jolı awır qáwpi kóp,Jer tutınsań jap saǵası gert jaqsı.

Bala qus qaytarıp salsańız awǵa,Babın tapsań barar, júrmes aldawǵa,Ishi pisip is tappaǵan jalqawǵa,Ermek etip oynamaǵa murt jaqsı.

Aqıl kerek, sóz mánisin tappaǵa,Gayrat kerek qatarında shappaǵa,Ózin bilgir esap etken aqmaqqa,«Bilmeyseń» dep kóndirmege urt jaqsı.

Túsinbege páhim kerek, oy kerek,Sóz aytılmas mániden tıs biydárek,Háli kelmey ot basında mógedek,Tırp etpesten otırmaǵa qart jaqsı.

Til bar giltdur, aqıl ǵaznasın ashar,Altın, mıs sandıqta ne barın shashar,Kóp sóz payda bermes, mazası qashar,Sóz sóyleseń, ózi qısqa short jaqsı.

Jigit jannan kesher eldiń arına,El arqayın sonday márttiń barında,Hárkim óz elinde ósken jerinde,Tilewles qalıń el, tuwǵan jurt jaqsı.