Gezdi qıyallarım tolǵanıp jattım,Izimnen keler dep jollarǵa baqtım,Saǵınıp janımdı otlarǵa jaqtım,Jollarıńa gúl tósedim, bilmediń.
Erinbesten tákirarladım atıńdı,Júregime orap jazǵan xatıńdı,Qásterlegen tuńǵısh muhabbatıńdı,Intıqtırıp, talpındırıp, kelmediń.
Náwbet penen kúnler zımırap óter,Ózge yar (uttıń ba, basıńdı kóter?!Súwretińdi kórip ıqlasım keter,Bultlar ızǵıp ǵayıp bolar, kórmediń.
Juwırıp shıqtım Aybúyirdiń basına,Hám atıńdı oyıp jazdım tasına,Sálem aytqan báhár qarlıǵashına,Keshiktirdiń, sonsha juwap bermediń.
Erkin oyım átirapıńa shashıldı,Diydarıńday «aq altın»lar ashıldı,Onı kórip taǵı mawqım basıldı,Sıǵalap talpındım, biraq kúlmediń.
Gúller sheshek atıp qulpırdı baǵlar,Qushaǵıńda oynap san-mıń jılwalar,ishqıńda bánt bolıp hár kún ırǵalar,Telmirip jolıńda kúter, sezbediń.
Úmit ushqınları sol ótken kúnler,Yadqa túsip ketse kewilim gúller,Shashımdı jelpise uytqıǵan jeller,Qayda barsam, sensiz qıyal gezbedim.
Lábizge isendim kelgeniń qayda?Oylarım julqınar sen júrgen jayda,Bálki... bararman dep gúzdegi toyǵa,Meni dilgir etken dilbar senbediń?