Alıp ketshi alıslarǵa qosıqlarımdı,O, kewlimniń qanatları, tań samalları.Aytıp barshı qarakózge arzıwlarımdı,Sayda terbep jas tallardı, tań samalları.
Áynegińnen sıǵalawǵa úlgermey sáwle,Qonbay turıp gúbelekler jas náwshe gúlge.Pák ıshqımdı járiya etip pútkil álemge,Tez quwandır súygen yardı, tań samalları.
Tez barıp jet saǵınıshlı xatlardan burın,Altın doynaq oynaqshıǵan atlardan burın,Tınıq túnde jılt-jılt etken otlardan burın,Tezden jetker bul xabardı, tań samalları.
Íshqım meniń—baxtım meniń, súysinsin jáhán,Baxtiyarlar ullı eli jaynay ber Watan!Bul muhabbat júregimde atqan tuńǵısh tań,Kóp kúttirme intizardı, tań samalları.
— XX ásir qaraqalpaq poeziyası antologiyası