Ey, yaranlar, endi bir sóz baslayın,Esitseńiz táriypini Shımbaydıń.Bárshe qız jawanlar waqtın xoshlayın,Bir-bir bayan áylep elin Shımbaydıń.

Ulıǵları oqır haqtıń sanasın,Sońra aytıp ótkenlerge duǵasın,Baylar qızı taǵıp tilla sırǵasın,Perizatdek qızları bar Shımbaydıń.

Basında jigitler atını baqar,At moynına laǵlı, marjanlar taqar,Jigit kórse qızlar qasını qaqar,Rustem kibi jigitleri Shımbaydıń.

Sawash bolsa miner bedew ústine,Tillıdan qamshısın alıp dástine,Janın qıyar ılaq shappaq qástinde,Shabandozdur jigitleri Shımbaydıń.

Qáddi boyın sárwi kibi gózlegen,Iba bilen qasın qaǵıp sózlegen,Lábin tislep júz mıń jilwa áylegen,Shiyrin sózli qızları bar Shımbaydıń.

Naz qarasta áylep lábini tislepSallanır-sıypanır belini uslap,Bárshe jigitlerdiń waqtını xoshlap,Tawıstay jilwa eter qızı Shımbaydıń.

Qáddileri shamsaddur, belleri názik,Qollarında inju-qaslı bilezik,Kózleri mastanadur, qasları jazıq,Qamar júzli qızları bar Shımbaydıń.

Shekilgen imladay qası qarası,Júzine shuǵlanur zulpı ziyası,Shamshi qamar kibi húsni ziybası,Shunıńday qızları bardur Shımbaydıń.

Jigitleri shıǵar bedew oynatıp,Jem ornına aq nabattı shaynatıp,Qız-jawanlardıń ishin qaynatıp,laq oynar jigitleri Shımbaydıń.

Maydanda saylanar gúl-gúl álwanlar,Ǵulpaǵı beline túsken uǵlanlar,Gúres tutıp qoshqar alur palwanlar,Shunıńday más bolur shahri Shımbaydıń.

Húsniy jamalını kórgen giripdar,Iyranıyda bolur keshsheler biydar,Qara zulpıń etmás ashıqqa bir tar,Shunıńday ashıq-mashıqları Shımbaydıń.

Qız-jigitleri bárshe otırıshma qurar,Kimi qasın qaqıp kózlerin súzer,Siynesidin bir jup almanı úzer,Ánjir, alma baǵları bar Shımbaydıń.

Dástúr shuldur shahri Shımbay eline,Jaman sózni hasla almas tiline,Qızları altın kese alıp qolına,Jigitke uzatar qızı Shımbaydıń.

Sharapnı uzatar tabassum áylep,Ádep-ikram bilen jigitni sıylap,Xosh tákallup bilen búlbúldek sayrap,Shiyrin tilli qızları bar Shımbaydıń.

On tórtlenshi aydek ravshan júzleri,Qas táginde oynar qara kózleri,Bergen sharabıdın shiyrin sózleri,Mahi taban qızları bar Shımbaydıń.

Qız jawanlar haytta qosar arbanı,Qulaǵına salıp tilla sırǵanı,Vaslına jetkenniń bolmas ármanı,Qara qaslı qızları bar Shımbaydıń.

Sháp tutur toqtatur qızlar arbasın,Jigitleri súrip atar jorǵasın,Tórem diyip qızlar aytar harmasın,Qara qaslı qızları bar Shımbaydıń.

Gúldek bolıp hayt máwsiminde shıǵar,Dal kóksine tilla háykelin taǵar,Jigit kórse qızdıń titirer bedeni,Tilla háykel taqar qızı Shımbaydıń.

Mısırdan ravajdur Shımbay qalası,Qara júrmel miner baydıń balası,At shappaqqa keńdur anıń dalası,Shunıńdayın elleri bar Shımbaydıń.

Boynı ekki gezdur beli bir qushaq,Bedew miner jipek kóylekshe shashaq,Kekilleri misli órilgen shashaq,On jeti gez atları bar Shımbaydıń.

Bir eli bar bahallı arsham,Tamashalar kórer barsalar hár jan,Dasturxan bilen alırlar miyman,Shunıńdayın elleri bar Shımbaydıń.

Bir-bir vaslın jazsam qaǵaz júzine,Neshshe qızlar ara berer ózine,Kóziń tússe qızlarınıń kózine,Qamar júzli qızları bar Shımbaydıń.

Tániń titirer aq júzlerin kórgende,Lábin tislep belin uslap turǵanda,Baldın láziz shiyrin lábin sorǵanda,Shiyrin-shakar qızları bar Shımbaydıń.

Sáyir etmege Shımbay eline barsa,Jánnette húr kibi qızların kórse,Bir kúnshe kórinbes, mıń kún hám júrseń,Qızıl-jasıl kiyer qızı Shımbaydıń.

Páriler uyalar jamalın kórse,Keshe ravshan bolur maydanda júrse,Mushku iyisi keler janında tursań,Gulandamdek qızları bar Shımbaydıń.

Hámme elden ullı Shımbaydıń eli,Kózleri bar, qıldan jińishke beli,Sózlese qandırar dúnyanıń miyrin,Xosh qılıq, xosh sózli qızı Shımbaydııń.

Kiygeni hasıldı, belleri názik,Bilekte bilezik, barmaqta úzik,Aytqan sózleri dúr, bes jılǵa azıq,Shiyrin-sháker qızları bar Shımbaydııń.

Óńirine tilla háykel taqılǵan,Kórgen yigitlerdiń baǵrı yaqılǵan,Gewishine tilla mıyıq qaqılǵan,Gúdirlesken qızları bar Shımbaydıń.

Kegeyliden suw aqadı barq urıp,Suw digirmen aylanadı sharq urıp,Bir ay seyil berer, mereke qurıp,At kótermes begleri bar Shımbaydıń.

Otırǵan jerinde hálisi qatar,Qızları Shımbaydıń sáddibe tutar,Qant kópirdi bir-birinen arttırar,Shunıńday dástúriy qızı Shımbaydıń.

Shashları súmbúldir kórseńiz bisyarJúzlerin kórseńiz bolursız biymar,Shay berur keseni áyleyip tayar,Shunıńdayın qızları bar Shımbaydıń.

Júzin kórgenińde titirer bedeniń,Ózleri shundayın bu kám qudanıń.Kórse erdiń alar mıń janın,Sóz aytqanda qızlarına Shımbaydıń.

Mudam sáwbet áyler dáwran ishinde,Hár kún sár áyleyur jazı qısında,Áyni shaǵı on tórt, on bes jasında,Qara kózli qızları bar Shımbaydıń.

Ol qara shashları beline túsken,Anarı almadek qızarıp pisken,Ólgende umıtılmas belin bir qısqan,Alma júzli qızları bar Shımbaydıń.

Bir tiyresi on tórt ruw diyerler,Qız jawanı qızıl qamqa kiyerler,Kórgen jigitlerdiń ishi kúyerler,Sallanur-sıypanur qızı sıypanur.

Jáne bir taypası qıtayı qıpshaq,Qızları bar uzın boylı keń qushaq,Qızlarınıń shashbawı bir dáste qushaq,Sárwi boylı qızları bar Shımbaydııń.

Jáne bir taypası Mańǵıt, Keneges,Bárshesi jetip tur ańa bir nápes,Gúlli gewish kiygenleri zerlipas,Qızıl-jasıl kiyer qızı Shımbaydıń.

Aqsham bilen shahri Shımbay arası,Anda bardur qız balanıń sáresi,Sıya kibi qaslarınıń qarası,Qálem qaslı qızları bar Shımbaydıń. j

Kórgen jigit sháhri Shımbay qızların,Aqlı ketip ayta bilmes sózlerin,Ópse biyxush bolar aydek júzlerin,Shiyrin sózli qızları bar Shımbaydıń.