ORÍNSÍZ JERGE ÓSHIKPE!

Yaki jayaw, ya atlı,Atıńdı aytıp shaqırsa,Yaki áste, ya qattı,«Xabarlas» dep baqırsa,Dalaǵa shıq, keshikpe!

«Jatırman» dep jalańash,Girjiygeniń jaramas,Sırttaǵı kisige,Dalaǵa shıq ta xabarlas,Telmirtip qoyma esikte.

Awırtıp ayaq arada,Qayqayıp alıp qalada,Aqılı az adamday,Júre berme dalada,Jatırsa balań besikte.

Gá uzayıp, gá kelterilip,Ashıw qısıp enterilip,At qoyıp birden ústine,Ózińnen óziń kóterilip,Orınsız jerge óshikpe.

Taysalıp shıray-júzińnen,Qaymıqsa qorqıp ózińnen,Qashqan jawǵa qatın er,Quwıp barıp izinen,«Tıǵaman» deme tesikke.

Aǵańnıń alsań aqılın,Biydáwletlikten qashıq bol,Tıńlasań gáptiń maqulın,Urdis et te ashıq bol,Atańnan qalǵan kásipke.

Ot-jemin berip qaratsa,Quyrıq-jalın taratsa,Seyisin tawıp jaratsa,At ta shabar bap penen.