ÚYGE KIRIP KELSEM ANAM QUWANAR…
Seydabulla PirjanovÚyge kúlip kelsem anam quwanar,Bir is pitkeripti meniń balam dep.Úyge oyshań kelsem anam tubalar,Náylaj bolma búytip onsha balam dep.
Qay waqta da ırayıńdı baqlaǵan,Ana ushın qımbat eken balalıq.Sharshap kelseń qoyarǵa jer tappaǵan,Ózinshe bir sımbat eken analıq.
Mehir sútin mıń qaytara emizip,Ana bizdi solayınsha ósirgen.Ol óziniń ishpegenin ishkizip,Alpeshlewdiń álwan túrin túsirgen.
Sonı qalay óterimdi tolǵanıp,Jol-jónekey qıyal súrip nábadaÚyge kirip keliwim de oylanıp,Bári-bári táshwish eken anaǵa.
— XX ásir qaraqalpaq poeziyası antologiyası