Tájetdin Seytjanov

    Tájetdin Seytjanov—shayır hám dramaturg.
T. Seytjanov 1924-jılı 5-mayda Kegeyli rayonında tuwılǵan. 1942-jılı ekinshi jáhan urısına atlanadı hám jaraqatlanıp 1945-jılı kaytadı. 1948-jılı Qaraqalpaq Mámleketlik pedinstitutın tamamladı. Mektep direktorı , rayonlıq jaslar komitetiniń birinshi xatkeri lawazımında isledi.
    Ol 1952-54-jılları Tashkentte partiya mektebinde oqıdı. Onı pitkerip kelgen soń “Jas Leninshi” gazetasında, radiokomitette aǵa redaktor, Oblastlık partiya komitetinde instruktor, “Ámiwdárya” jurnalınıń bólim baslıǵı, mámleketlik filarmoniyanıń direktorı, qalalıq mádeniyat bóliminiń baslıgı, “Sovet Qarakalpakstanı” gazetasında, mámleketlik televidenie hám radio esittiriw komitetinde baslıktıń orınbasarı bolıp isledi. 1986-jıldan Jazıwshılar awqamında xızmet etti.
    T. Seytjanovtıń dáslepki qosıqları 40-jıllardıń aqırlarında járiyalana basladı. Shayırdıń “Azamat jırı” (1955), “Ziyba” (1959), “Qanatlı jaslıq” (1960), “Ayna aldındaǵı sóz” (1965), “Báhár seni saǵındı” (1975), “Muxabbatnama” (1976), “Ómir filosofiyası” (1979), “Meniń arifmetikam” (1983), “Tasqın” (1990) sıyaqlı poeziyalık toplamları basıldı.
    Dramaturgiya tarawınaa T. Seytjanovtıń “Qırlı soqpaklar” (1958), “Tınımsız tolqınlar” (1964), “Kúygelek kózli yar” (1959), “Jalın” (1969), “Abu Rayxan Beruniy” (1973) pesaları saxnalastırıldı.
Ol Nekrasovtıń “Rusta kim jaqsı turadı?”, “Rus xayalları” poemaların hám Shevchenko, Nazım Hikmet, Rasul Ǵamzatov shıǵarmaların qarakalpaq tiline awdarǵan. Onıń rus xám ózbek tillerinde toplamları basılǵan.
    T. Seytjanov “Qaraqalpakstan xalıq shayırı” (1974), “Qaraqalpaqstan Respublikasına miyneti singen mádeniyat xızmetkeri” (1969).
    Ol “Danq” ordeni, medallar, Ózbekstan xám Qaraqalpaqstan Respublikası Joqarǵı Keńesiniń Húrmet jarlıqları menen sıylıqlanǵan.
    T. Seytjanov 1955-jıldan Jazıwshılar awqamınıń aǵzası.