Turǵan boyra, júrgen dárya— naqılda,Ómirde óteseń bir aǵıs bolıp.Jaslıq dáwran turǵanıńda basıńda,Dúnyaǵa piteseń gúl-naǵıs bolıp.

Óz náwbeti bolar jaslıq dáwrannıń,Gúller ǵumshasınday ashılǵan jazda.Adam qızıǵına toymay jáwlannıń,Sheksiz bir ómirge ańsaydı bazda.

Hárkimniń tilegi uzaq jasamaq,Jaq demes tábiyat qansha jas berse.Bas tartıp qalalmas hársheńki adam,Júzden asqarınan eger dás kelse.

. Dawam etken sayın ómir saparı,Hárkimniń ıǵbalına jarasa berer.Biraq, elespesiz túrde qatarı,Qaytıp kelmes jolǵa tarasa berer.

Bir ǵarrını kórdim bálki ármansız,Júzden asıp ketken jasaǵan jası.Aq shashları túsken, dińke-dármansız,Biraz jıldan beri dastıqta bası.

Kókirek sayraydı nágada qısqa,Lekin qatnası joq alaǵadaǵa,Onıń úrp-ádeti, jargonı basqa,Sırlas, dártlesi joq jaqın arada.

Quwanısh, qayǵınıń bári bir oǵan,Quddı nárestege uqsar kóp asa.Onıń baxıtı sol — úyde bir adam,Xoshametin aytıp kúlip qarasa.

Jaslıq táshwishleri, ǵam-ǵussaları,Ómirlik júkleri ótken basqaǵa.Basqa dástanlarda «álqıssa»ları,Zárre qıyalı joq shalqıp taspaǵa.

Qarasa kórmeydi aqtı-qaranı,Shubat eń qálegen jaqsı tamaǵı.Arqalap barmasa aqlıq ulları,Shıǵıp kóre almas jaqtı dalanı.

Solay jasap atır eken dım tozıp,Ótken ásirdiń bir jas náwqıranı.Kókirek soqpasa da júregi soǵıp,Tek nápes aldırar shıqpaǵan janı.

Hár uzaq sapardıń pursatı bardı,Tınsań jarasıqdur ármanıń menen.Bul asa ǵarrılıq qorqınısh yańlı,Túwel jasamasań qatarıń menen.