HADAL ADAMLARDÍŃ JÚREGI

Adam degen ájayıp nárse,Onda sırlı materikler bar.Ilim onı tekserip kórse,Ele kóp nárseni anıqlar.

Doktor anıqlaydı keselin,Rentgenge salıp kóp qarap.Biraq qanday adam ekeninAyta almas heshbir apparat.

Janı iplas janlardı, doktorAytsa «júregi taza» dep.Júreginde awırıw kópdur,Dúzelmeydi pal jep, ǵoza jep.

Júrek, júrek ayayman seni,Janı iplaslardıń júregi!Sol qarańǵı saraydan seniSırtqa alıp shıqqım keledi seni.

Qayda barsa sen sonda barıp,Xızmet qıldıń sen oǵan uzaq.Abaysızda qorshawda qalıp,Asir túsken adamǵa usap.

Janı taza janlardı doktor,«Júreginde daq» dep qıynama.O, olarda pazıylet kópdur,Bile-bilmes medicina da.

Júrek, júrek, jábirkesh júrek,Hadal adamlardıń júregi.Seni jaqtı quyashqa teńep,Kóklerge kótergim keledi.

Adamlardıń hadal ekeniAylandırmas EVM miyin.Kimniń qanday adam ekenin,Adam biler eń aldı burın.

Jaqsılardıń júregi, bálkim,Dawa tappay joǵalıp keter.Biraq atın óz iyesinińBálentlikke shıǵarıp keter.