MEN TUWÍLǴAN JERDE

Qarlıǵashlar ushar, ushar sharshamas,Palapanlarına ırısqı izlep.Búlbúller baǵında sayrap jalıqpas,Tańlarıńnın sulıwlıǵın táriplep.Qunırılar ǵuǵırlap sayabanlarda,Janımnan kete almas alısqa ushıp.Kógershinler shıńlı qıyabanlarda,Tal túste mashqı eter kún nurın qushıp.Quslardıń párwazın men sende kórdim,Seniń bostanıńdı sol ushın súydim!

Xoshirey tábiyatlı jaylawlarıńda,Shopanlar qosıǵın tıńlap qunıǵıp.Hám juwsan iyisli dalalarıńda,Dem aldım, sel jawınnan soń tınıǵıp.Sonda gúl ıshqıńda ızǵıp elpeńlep,Gúbelekler gezer jońıshqalıqta.Hárreler pal izler tozań sebelep,Qızǵanısh ızıldısı, qanatlarında...Gúllerdiń názigin men sende kórdim.Seniń keń dalańnıń gúlzarın súydim!

Gúz kelse tógilip zapıran japıraqlar,Salqın samal gezer oypatlarıńnan.Gúmis kúlki shashsa jaynap ǵawashalar,Paxta tergim keler atızlarıńnan.

Qırman paxta punktı eki aralıq,Telejkalar zımırar gúzar jollarda.Bayram húrmetine qızsa tayarlıq,Bayraqlar jelbirer jedel qollarda.Kárwanlar dizbegin men sende kórdim,Seniń baylıǵıńdı barım dep súydim!