1916–2001
Bayniyaz Qayıpnazarov — belgili shayır.
B. Qayıpnazarov 1916-jılı 25-avgustta Shımbay rayonında tuwılǵan.
1939-jılı Tórtkúldegi muǵallimler institutın pitkerip, óz awılında muǵallim boladı (1939-1941). Ekinshi jáhán urısınıń baslanıwı menen frontka atlanadı (1941-1944), jaraqatlanıwına baylanıslı fronttan qaytqan B.Qayıpnazarov muǵallimshilik jumısın dawam etti (1944-1946). Ol Jazıwshılar awqamında másláhátshi (1946-1947), radioesittiriw Komitetinde (1947-1948), mámleketlik baspada (1948-1951) redaktor bolıp islegen.
B. Qayıpnazarov 1951-1956- jılları Moskvadaǵı M.Gorkiy atındaǵı ádebiyat institutıńda oqıdı. Al, 1956-1958- jılları “Ámiwdárya” jurnalınıń bas redaktorı, Jazıwshılar awqamında másláhátshi (1958-1963), “Ámiwdárya” jurnalında bólim baslıǵı, 1967-jıldan xúrmetli demalısqa shıqqanǵa shekem (1986) “Qaraqalpaqstan” baspasında aǵa redaktor boldı.
Shayırdıń dáslepki qosıqları 30-jıllardıń ortalarında jarıqqa shıqtı.
Onıń “Qosıqpar”(1940), “Xalıqqa xızmet qılaman” (1947), “Altın gúz”(1959), “Kuwanısh qosıqları”(1950), “Bozjap boyında”(1955), “Kók emen”(1956), “Kızıl gúl” (1958), “Súy dostım”(1962), “Meniń Oatanım”(1956), “Meniń baxtım”(1968), “Eki ayaz”(1970), “Nárўan”(1972), “Gúldáste” (1981), “Men seniń bir shaqańman” (1977) sıyaqlı toplamları járiyalanǵan. Sonıńan “Tańlamalı shıǵarmaları” (1981), 1985-jılı poemalar toplamı hám balalarǵa arnalǵan “Jarlı adam hám ǵarǵalar patshası” kitabı basılıp shıqtı.
B. Qayıpnazarov tuwısqan xalıqlar poeziyasınan Tvardovskiydiń “Vasiliy Terkin”, Sh. Rashidovtıń “Kashmir qosıǵı” poemaların,sońday-ak, Lermontov, Mickeevich, Yan Raynis, Shevchenkolardıń qosıqların awdarıwǵa qatnastı.
B. Kayıpnazarov birinshi dárejeli “Watandarlıq urıs ordeni” hám medalları jáne Ózbekstan hám Qaraqalpaqstan Respublikası Joqarǵı Keńesiniń Húrmet jarlıqları menen sıylıqlanǵan. Ol “Qaraqalpaqstan xalıq shayırı” (1976) “Qaraqalpaqstan Respublikası Berdaq atıńdaǵı mámleketlik sıy- lıǵınıń laureatı” (1984) húrmetli ataqlarına iye edi.
B. Kayıpnazarov 1939-jıldan Jazıwshılar awkamınıń aǵzası.