Báhár kelgen sayın jayǵan japıraq,Kún nurında kúlip turǵan jarqırap,Tuw alıstan kózge túsken buldırap,Sen — bayterek, men —seniń bir shaqańman.

Sahraǵa sán berip qáddin dúzegen,Gózzal kórki Ámiw boyın bezegen,Usha bası álhawanı gózlegenSen — bayterek, men —seniń bir shaqańman.

Sen shayqalıp ósseń, men de ósemen,Sen pát berseń, men jel bolıp esemen,Sen arqalı jurt kózine túsemen,Sen —bayterek, men —seniń bir shaqańman.

Keń óris jaylawsań jasıl giyalı,Mehriban anasań altın ayalı,Jetilgen nárwansań salqın sayalı,Sen —bayterek, men —seniń bir shaqańman.

Meniń sheksiz dalam, ashıq aspanım,Terbelgen besigim, tilde dástanım,Dańqlı úlkem — Qaraqalpaqstanım,Sen— bayterek, men —seniń bir shaqańman.