Xojam iserseń, keberseń,Óz dáwletińe teberseń,Eshek pishpege sheberseńEshek súnnet etken xojam.
Bul xojaday xoja qayda,Usındaydan kórgen payda,Eshek piship Dawılbayda,Eshek súnnet etken xojam.
Dawılbayǵa shıǵır ektiń,Shıǵırıńdı millet ettiń,Jeti eshekti súnnet ettiń,Eshek súnnet etken xojam.
Xojam eshekti sıyladı,Qulaq-quwrıqtı jıynadı,Qazaqı qapqa sıǵmadı,Mambetqulǵa satqan xojam.
Bul xojanıń mini bar ma?Eshek kórse jini bar ma?Qaraqalpaqsız kúni bar ma?Eshek súnnet etken xojam.
— Berdaq - Tańlamalı shıǵarmalarınıń jıynaǵı
Ǵaziynesi toldı ma eken?Qızıl gúli soldi ma eken?Eshek hadal boldı ma eken?Eshek súnnet etken xojam.
Dáwkempirge ektiń tarı,Jarımshıǵa berdiń jarı,Hár qulaǵı on aǵarı,Eshegińniń júgi, xojam.
Xoja degen sayıl bolar,Ne berseń de qayıl bolar,Shın xoja álpayım bolar,Ádepsizlik etken xojam.
Etpey ázelde buwrıǵın,Jazdırdıńız ba jıyrıǵın?Eshektiń kesip quyrıǵın,Ájayıp is etken xojam.
Eshekke háwes edińbe?Mazalı eken dedińbe,Kesken quyrıqtı jedińbe?Eshek súnnet etken xojam.
Bul xojaǵa bar ma xamal,Esheklerge berip zawal,Qulaq kesken Seyitkamal,Eshek súnnet etken xojam.
Etken isiń bayqadı ma?Eshek tolındı shayqadı ma?Qumarınız tarqadı ma?Eshek súnnet etken xojam.
Eshekler qaldı mayrılıp,Quyrıq, qulaqtan ayrılıp,Berdaq pıraqtan ayrılıp,Záhmet shegip qaytqan, xojam.