Zamanda

Shaqqan ayaq basıp xızmet etpeseń,Kúnler kóriw qıyın bunday zamanda.Oylap-oylap maqsetińe jetpeseń,Ómir súriw qıyın bunday zamanda.

Azamatlar, ayaǵıńdı shaqqan bas,Shaqqanlap baspasań kózden aǵar jas,Bolmayın deseńiz qayǵıǵa joldas,Hasla albaw bolmań mına zamanda.

Jolda dushpan ordı qazıp jatarlar,Yazitlerdiń jolın bekkem tutarlar.Ózi tiymegenge kesek atarlar,Aman júriw kerek bunday zamanda.

Sitemkerlik etse miyrimsiz zalım,Birikseń jeterler bálentke qolıń,Shashaw júrseń, kimge bolar obalıń,Bul qayǵılı alasatlı zamanda?

Kóller juda boldı órdek-sonadan,Erler juda boldı qatın-baladan,Ul-qız ayra túser ata-anadan,Boz duman qaplaǵan qayǵı zamanda.

Tilla kekilleri marjan tókilmish,Aytsam kózde jasım bárha egilmish,Qabırǵa say bolıp dal-dal sókilmish,Hayran boldım bunday qayǵı zamanda.

Kewlim isyan tabar qayǵı dárt bilán,Sheriń tarqar jurtta batır márt bilán,Joldas bolma óziń bilmas gúrt bilán,Halıń qıyın bolar bunday zamanda.

Jáhillerden heshўaq alma amanat,Kótererseń aqırında jaman at,Bul zamanlar bolıp atır álamat,Kimse ǵamgún, kimse shad bul zamanda.

Baylawlıdur bul zamanda qollarıń,Berdimurat, qıyın seniń hallarıń,Tirińde bolmadı hasla jollarıń,Árman menen keter boldıń zamanda.

Berdimurat, kóp oylanıp bolma lal,Jası úlkenniń ólgenińshe aqlın al,Jası kishi, ballar endi qulaq salAytqan sózlerime bul bir zamanda.

Zalım qısım eter xalqıma sansız,Júzinde nurı joq gileń iymansız,Móhmin qullar otır telmirip nansız,Joqshılıq jábiri ótti zamanda.

Dúnya dep ǵam shekseń onnan payda joq,Shadlanarmız degen endi oyda joq,Ǵariplerge hayt-mereke, toy da joq,Kewliń ziynet tappas bunday zamanda.

Zaman jıldan-jılǵa teris aynaldı,Aqıllılar jol taba almay oylandı,Júyrik sheshenlerdiń tili baylandı,Qaranǵı qaplaǵan qayǵı zamanda.

Qız-jawanlar súygenine ketpedi,Sháriyat sharımına ilaj etpedi.Biydártlerdiń buǵan aqılı jetpedi,Aqılı jetken qolı jetpes zamanǵa.

Men ólmespen, sózim júrer bárhama,Tuwısqanı kóp adam jawdan qorqa ma?Zalımlardan qorqıp baqpa arqańa,Mákkem ayaq basıń bunday zamanda.

Bas amanlıq ushın etken tobańız,Bir bas emes máger qońsı-qobańız.Kepin tawıp ólse ata-anańız,Shúkirlik áylerseń bunday zamanda.

Bay bolsań malıń kóp, - boldıń ármansız,Jarlı bolsań, - isiń boldı pármansız,Qalay qılar ash-arıqlar dármansız,Bunday qayǵı hásiret turǵan zamanda?

Óz-ózim otırıp párman etermen,Sózimdi dártlige dárman etermen,Tilim baylawlıqtan árman etermen,Bir jazılısıp ayta almadım zamanda.

Hásige ketpeyin, táwbe eteyin,Háy aǵalar, ótirik aytıp neteyin.Ólsem sózim qalar, aytıp keteyin,Ne kórdim men ádira qalǵan zamanda?

Qadirimbet shákirtim, atım Berdimurat,Ekkimiz maydanda ettik mulaqqat,Onda kók júrmel bar, mende qara at,Júrdik birneshshe jıl bunday zamanda.

Shayır Berdimurat allaniń qulı,Sahrada sayraǵan búlbili,Bul qosıqtı ayttım men dońız jılı,Qadirimbet, hikayatım zamanda!