Sáhár waqta minsem Mashuk tawına,Kúldi kúnshıǵıstan tańnıń juldızı.Gúmis bulaqlardıń shoq qaynawı daSeni eske saldı, Ámiwdiń qızı.
Tawdan aq bultlardı aydasa samal,Bılǵap turǵandaysań maǵan oramal.Suw ishiwge kelgen bir arıw maralSaǵan megzep qaldı, Ámiwdiń qızı.
Asqar taw Elbrus aspanǵa tiygen,Sımbatlı aq tósin kókshe bult súygen.Báhár bayramında aq kóylek kiygenTurqıńdı yad ettim, Ámiwdiń qızı.
Samal sıldırlatsa japıraǵın taldıń,Seni keldi me dep talay aldandım.Keklik dúrlep ushsa astınan jardıń,Jamalıń elesler, Ámiwdiń qızı.
Kórsem sıńq-sıńq kúlgen suwların saydıń,Tıńlap shopan shertken sestin sırnaydıń,Sonda bir sen bolıp shadlıǵım, qayǵım,
— Búlbil uyası
Narzan bulaqları qanday azada,Seniń kewliń yańlı tınıq hám taza.Tawlar oyanadı, kewlim biymaza,Inkarım ózińseń, Ámiwdiń qızı.
Saǵınıshlarıń biylep bar taqatımdı,Tas ústinde turdım oqıp xatıńdı.Jazsam jas emenge oyıp atıńdı,Tawlar yadlap aldı, Ámiwdiń qızı.
Beshtaw munarlanıp turar qasımda,Kókshe bult jelbirer ushabasında.Hár kim yar ıshqında kúyse jasında,Mendey bolıp kúysin, Ámiwdiń qızı.