DOSTÍMA

Sırlas bolǵanıńday suw menen jaǵıs,Jaslıq gezlerden-aq hawazıń tanıs.Keshlerde qosıǵıńdı esitkenimde,Oysaldı júrekke juldızlar alıs.

Kewliń gózzallıqqa mudam jaz bolıp,Geyde aydın kólge ushtıń ǵaz bolıp.Kórip tábiyattıń sulıwlıqların,Ishqı sazın sherttiń Ajiniyaz bolıp.

Mısal sayrawınday baǵda búlbúldiń,Boldıńız mudamı ashıǵı gúldiń.Tońlardı eritken báhár nurınday,Jaslıq júreklerge jol taba bildiń.

Oyın qurǵanınday aydın kólde ǵaz,Jan azıǵı bolar qosıq penen saz.Júrek namalarıń esitilgeninde,Men de gózzallıqqa boldım ıshqıpaz.