Poetica

KELGENMEN BUL DÚNYAǴA

Joldasbay Dilmuratov

Quyashtı kóriw ushın,Sırların biliw ushın,Ómirdi súyiw ushın,Kelgenmen bul dúnyaǵa.

Daraqtay miywesi kóp,Ósiwge alǵa órlep,Júregim jaqsılıq dep,Kelgenmen bul dúnyaǵa.

Jayılıp shaqalarım,Arnalıp elge barım,Tatıwǵa ómir palın,Kelgenmen bul dúnyaǵa.

Qatardan qalmayın dep,Búlbúldey sayrayın dep,Baxıttı jırlayın dep,Kelgenmen bul dúnyaǵa.

Insanǵa ıǵbal tilep,Xalıq tınısh jasasın dep,Óssin dep ómir gúllep,Kelgenmen bul dúnyaǵa.

Ketpewge gúldey solıp,Afǵıwǵa tasıp-tolıp,Ómirge ashıq bolıp,Kelgenmen bul dúnyaǵa.

Talpınıp keleshekke,El ıshqı haq júrekte,Jaqsılıq ushın tek te,Kelgenmen bul dúnyaǵa.

— XX ásir qaraqalpaq poeziyası antologiyası

Joldasbay Dilmuratov qosıqları