Ayapbergen Muwsaev — ataqlı xalıq shayırı, XX ásirdegi qaraqalpaq ádebiyatınıń baslawshılarınıń biri.
A. Muwsaev 1880-jılı Moynaq rayonındaǵı Sorkól awılında tuwılǵan. Xalıq shayırı Sorkól volostınıń xatkeri (1925-27) boldı, mayda xojalıqlardı artelge birlestiriwde ayrıqsha kózge túskenlerdiń biri.
Xalıq shayırı belgili qıssaxanlardıń biri edi. Ol kóplegen dástanlardı yadqa bildi, shıǵıs klassik shayırlarınıń shıǵarmaların kópshilikke jetkeriwde ayrıqsha orın tuttı. Eki túrli zamandı kórgen shayırdıń óziniń shıǵarmaları da kópshilikke keńnen málim boldı, onıń dóretpeleri sol waqıttıń ideyalıq talaplarınan kelip shıqtı hám olarǵa durıs juwap berip otırdı.
Shayırdıń eń birinshi toplamı óz aldına kitap bolıp “Shıǵarmalar” degen at penen 1941-jılı basılıp shıqtı, al usıǵan shekem onıń dóretpeleri xalıq arasında awızsha túrde tarkaldı. Shayırdıń shıǵarmaların jazıp alıw hám baspaǵa tayarlawda N.A. Baskakov, T. Bekimbetov, X. Axmetov, T. Safiev, O. Kojurov, K. Ayımbetov, N. Japaqov, M. Nurmuhamedov, Q. Bayniyazov hám taǵı basqalar kóp jumıslar isledi. Onıń shıǵarmaları bir neshe ret (1956,1960,1980) tolıqtırılıp qaytadan basılıp shıqtı.