Kewlim aytar, jurt sorasam, biy bolsam,Maǵan óytip boysınǵanday el qayda.Qarun kibi jurttan ozǵan bay bolsam,Altın, gúmis dúnya menen mal qayda?

Jurtttan ozǵan shayır bolsam men ózim,Mıń-mıńnan keltirse hár awız sózim,Sáyir etsem jáhándi, dúnyanıń júzin,Kewlim tiler, baratuǵın hal qayda?

Qustay qanat qaǵıp, aspanǵa ushsam,Jer júzine túsip, gózzallar qushsam,Kese alısıp, shay ornına pal ishsem,Suw tabılmas, endi bizge pal qayda?

Ólmes ómir berip, súrsem dáwrandı,Kewilde hesh qalmay zárre ármanı,Qırmızı ton kiyip, súrsem jorǵanı,Aqır bir kún shıqpaytuǵın jan qayda?

Qayǵılı qápeste kúnim keshken soń,Qazan urıp, gúlim solıp óshken soń,Saqalıń aǵarıp, tisiń túsken soń,Taza nawjawanday qáddi dal qayda?

Doslar kóp bolar dáwletiń bolsa,Jamanıń jasırıp, jaqsıńdı jaysa,Bir kúni dáwletiń basıńnan taysa,Qol ushın bergendey jana-jan qayda?

Jaman shuldur jolın tawıp júrmese,Miyman kútip kisige nan bermese,Sóz sóylese, sózdiń parqın bilmese,Bunday jaman nadanlarǵa san qayda?

Jigit at kótermes, miyman sıylamay,Sóz sóyleme, istiń parqın oylamay,Mańlaydan ter aǵıp janıń qıynamay,Miynet shekpey tabılǵanday nan qayda?

Aqıl kerek sóz mánisin bilmege,Rahbar kerek túrli joldan júrmege,Bay, jarlını bir kóz benen kórmege,Gárip aytar ádalatlı xan qayda?