Arjaq-berjaq bolıp eki san bolǵan,Bólim-bólim eller qaraqalpaqtadı.Ǵarqıldasıp úyrek ushın, ǵaz qonǵan,Aydın-aydın kóller qaraqalpaqtadı.

Sharwaları kóship ataw jaylaǵan,Biye sawıp, qatar qulın baylaǵan.Qulan-kiyikleri sekirip oynaǵan,Qıya-qıya shóller qaraqalpaqtadı.

Begleri bar tawdan atın sckirtken,Joldas etken belli-belli jigitten,At shawıp, qus salıp, tazı yúgirtken,Ullı-ullı begler qaraqalpaqtadı.

Danıshman, xosh sózli fahm-idrakli,Urısta bir ózi mıńǵa derekli,Góruǵlı hiybatlı, Rustem yúrekli.Belli-belli jigit qaraqalpaqtadı.

Jigitleri el gezer qızınıń qastında,Gıúlleri ashılǵan báhar paslında,Alma kózli, árebi atlar astında,Mart ǵoshshaq jigitler qaraqalpaqtadı.

Qızları bar qıya-qıya qasları,Iynin jabar órim-órim shashları,Shashbawında gáwhar hasıl tasları,Húr periyzat qızlar qaraqalpaqtadı.

Bir qıldan názikdur qıpsha belleri,Buwın-buwın tarqanalı álleri,Shekerdey mazalı shiyrin tilleri,Taza nawjawanlar qaraqalpaqtadı.

Laǵlı marjan-haqiq ne hasıl zatlar,Shákirtler ustazdan alıp irshadlar?,Nar túye, doynaqlı dal bedew atlar,ándamlı nárbuwdan qaraqalpaqtadı.

Sahrada seyil etip jıǵın baslaǵan,Qarshıǵa, aq tuyǵın, lashın qus salǵan,Aq-qara bas sona, súylin uslaǵan,Qus salǵan qálpeler qaraqalpaqtadı.

Mereke-májiliste, haytı-toyında,At shawıp, mayırǵan kókmar oyında,Sawın bayraq alǵan ullı jıyında,Belli shabandozlar qaraqalpaqtadı.

Gárip aytar ótti neshe jahanger,Hárkim elin jaman demes, jaqsı der,Mir-Alisher, Jiyrenshege taqabbil,Ataqlı shayırlar qaraqalpaqtadı.