Ómirim qosıq bolıp jilwalanar,Shabıtım tolqınlanıp qanǵa tarar,Kenńpceyillik gewdeme ol jarasar,Qıyın-qıstaw kún bolsa dártke jarar.
Oyımnan keter dáwir jılnaması,Zamanım gúl baxtımnıń pármanası.Talwası talpınadı shıńdı kúsep,Armanıńnıń gúl mıyıqlı ol arbası.
Juldızı qas qaǵımnan aǵıp óter,Ómirdiń shamshıraǵın jaǵıp óter.Kewildiń sarayınan gúl ósirip,Júrekke yosh-ilhamın salıp óter.
Sezimge tolı bolıp ózin bilmey,Párwazıń biyiklener qarap júrmey.Aq qaǵazǵa tógiler sóz marjanı,Tawımnan qulap aqqan júyrik jeldey.
Bolmas heshwaq qurǵaq shóptiń jalını,Bel baylaǵan namıs penen arını.El birligin erlik penen saqlaǵan,Quwanıshım mártlerimniń barlıǵı.
Erkinlik shadlıǵım tolıp-tasayın,Nesip etken biyiklikten asayın.Insap, iyman, tuwrılıq sóz patshası,Qanǵa sińgen qosıq penen jasayın.
Qosıǵım quwanısh, qayǵı-ǵamıńda,Shımbırlap kirmey me názik janıńa?Nurmuhammed, sezdiń ómir ıshqısın,Shúkirlik, táwbem zor atqan tańıma.