ÓRLETIP KETER

Áke quwanıshı shalqar kól bolar,Súyinish arqan ol tutas el bolar,Ákesiz óskeniń esken jel bolar,Turmıs ǵalma-ǵalın úyretip keter.

Ómirińde bilseń áke qádirin,Mazalı ótedi ómiriń shiyrin,Talpınar tartıwǵa tolqınlı iyrim,Ózińdi bos tutsań súyretip keter.

Jeterli bárine aqıl-oy kerek,Bilimge qanıqqan taza miy kerek,Kishipeyillikti tutpasań ziyrek,Hár muqamǵa salıp biyletip keter.

Sezim qábiletiń bolsa ózińde,Jaqsılıǵıń qalsın deymen izińde,Tiykar bolsa aytqan hárbir sózińde,Qáste júreklerdi emletip keter.

Nurmuhammed nesip etpese diydar,Sıypalanbay qalsa jaslıqta aydar,Watanıń jan dúnyań bolıp namıs-ar,Zamanım shadlıǵım órletip keter.