PERZENTIM

Bul aytqanım bir kórinis ómirden,Hárbir múshem qattı boldı temirden,Azaplarım kórinip tur óńirden,Bes ordenim, bes mártligim, perzentim.

Sen bolarsań meniń ekken teregim,Usı edi ómirden de keregim,Sennen kútip keleshektiń dáregin,Maqtanaman seniń menen, perzentim.

Quwanıshım, keleshegim «ózińseń,Izimde qaldırǵan jaqtı kózimseıń,Túr-túsiń usaǵan naǵız ózimseń,Ómirimniń jalǵasısań, perzentim.

Bosaǵasın atlap turman eliwdiń,Qızıǵı kóp kóre berseń ómirdiń,Balalıq shaǵıma qaytıp keliwdiń,dolların izlegim keler, perzentim.

Jaslıǵımdı men ózińnen kóremen,Sen bar jerde ózim bar dep bilemen,Sen arqalı mıń jasayman ele men,Ómirimniń jalǵasısań, perzentim.