BÁHÁR KELDI

Esti mine sáwir jeli,Janǵa jaylı táwir jeli,Tońdı eritedi seli,Kók gúrkiretip báhár keldi.

Hesh maqluqqa bermes hazar,Bári túlep boyın jazar,Kókke qaray qolın sozar,Nur sáwleli báhár keldi.

Quyash jaylap jerdi, kókti.Toǵayǵa, shólge de jetti,Taw, sayǵa da nurın tókti,Baǵlarıma báhár keldi.

Kimge kerek bolsa jemis,Bereri kóp qalma tegis,Miynet etip alıp jeńiz,Mol jemisli báhár keldi.

Qıstan hesh belgi qalmadı,Mısalı dım qıs bolmadı,Sıran óz basın jalmadı,Jayma shuwaq báhár keldi.

Qıs qırawı muzǵa ótti,Muz da aqır erip ketti,Shadlıq kókti gúrkiretti,Azat, miynet egis keldi.

Atızlarda quyash nurı,Oyatadı onı, bunı,Oǵan kimniń qızbas jonı,Báhár nurı tegis keldi.

Qıs alıp ketti kórpesin,Bilgen ǵoy tezirek kelmesin,Islemegen — sol jemesin,Islegenge jemis keldi.

Jer jamılıp jasıl lipas,Sán beredi iyne qalas,Teńge japıraq tartar ıqlas,Miynet penen jeńis keldi.

Írǵalar biyday dalası,Jaǵımlı búlbúl naması,Tıńlanar ashıq nalası,Arqaw menen eris keldi.

El shetine keler átshók,Awıl aralar ópepek,Bir qus sayrar, biri gók-gók,Dawısları sáhár keldi.

Kepterler toparın dúzer,Ózinshe jámlesip gezer,Ashıqlar da zeyni sezer,Jaynap jasnar máhál keldi.

Túslikten kiyatır ǵazlar,Uyrekler de bizde jazlar,Qosıp kewilli hawazlar,Janlı-janǵa báhár keldi.

Quslar tabar óz mákanın,Kólimniń keltirer sánin,Hám ushırar palapanın,Ónip-óser máhál keldi.

Kóbiklesip dárya tasıp,Eki jaǵasınan asıp,Kanallarǵa tolqınlasıp,Abxorlar tur, báhár keldi.

Salmalarda tartar iyrim,Shad boladı kórip kewliń,Iship kóriń shiyrin suwın,Atızǵa júr, báhár keldi.

Hasıl jer bawırın iyer,Jańa jasıl lipas kiyer,Denede qaynasıp jiger,Jemis alar máhál keldi.

Diyqan sazlap ásbap, belin,Tez dúzetip atız shelin,Kereginshe egip egin,Iygilikli jumıs keldi.

Qáne, qozǵalıń, bárshe dos,At qos, ógiz qos, bárin qos,Waqtında umtıl, qalma bos,Jańasha qızǵın is keldi.

Maqpal kórpe jerdiń beti,Tınıq ayna kóldiń beti,Júziń jarqın kórinedi,Elge jańa jumıs berdi.

Erte egin ekkenlerge,Eki ret tókkenlerge,Hadal miynet shekkenlerge,Mardan-mardan ırıs keldi.

Qurqıltay uyaǵa sheber,Qaysı qus ta párin tóger,Ílaq-qozı kókke órer,Jan ház eter máhál keldi.

Aytar sózim: ul-qızlarım,Miynet dúzer turmıslarıń,Alǵa, alǵa jumıslarıń,Shadlı baxıt, báhár keldi.