Aynımas, tuwısqan emes te quyash,Jalııldap qızdırǵan nurı quyashtıń.Bánt etken júrekti ózine ashıq,Sup-sulıw dóńgelek túri quyashtıń.

Jayıńda mudamı shanlı dimarı,Shanlı dimarına baylı jer sharı,Jaynaǵan jaǵımlı qızıllı, sarı,Altın ba, gáwhar ma ózi quyashtıń?

Nur jayıp aspanda mudamı taq turıp,Tań atırıp jer jáhándi jaqtırtıp,Mıń jola qarasań tuwra zer berip,Hasla joq júzinde kiri quyashtıń.

Túnniń qap-qarańǵı túnerip jayı,Meyli kóp bolsa da juldızı-ayı,Tap, qáne, dúnyada bar ma hesh tayı,Taysız-teńsiz bar kúndizi quyashtıń.

Biyik-biyik tawdan aǵadı seller,Nur alıp quyashtan dárya hám kóller,AÁlwan-álwan dónip ashılar gúller,Bir kúlip qarasa kózi quyashtıń.

Jaǵımlı-jaǵımsız samallar esken,Jahanǵa shadlıqlı daǵaza túsken,Baǵlarda mıń álwan miywalar pisken,Hasla esten shıqpas jazı quyashtıń.

Shayırlar qálemin qolına alsa,Bar kúshin kún-túni qosıqqa salsa,Yaki tilden on jıl aytajaq bolsa,Aytıp ada bolmas sózi quyashtıń.