Xalıq ushın tuwılıp kámalǵa keldiń,Jawınger jasları baxıtlı eldiń,Watanıńa búgin wádeńdi berdiń,Wazıypańdı orınlap kel, perzentim.

Gúllengen turmısta shad bolıp óstiń,Mine, soldat qatarına ilestiń,Nátiyjesin bilip ullı gúrestiń,Chapaevtay bahadır bol, perzentim.

Tuwǵan eldiń ar-namısın alıp kel,Dushpannıń basına sawda salıp kel,Jeńistiń namasın tezden shalıp kel,Meniń saǵan tapsırmam sol, perzentim.

Sawash maydanında qaramań izge,Talap áyleń onlap shanshıp bir júzge,Xalıq ushın ılayıq gúresler sizge,Jolıń bolsın, wádeńdi ber, perzentim.

Shıqtıńız tolısıp on segiz jasqa,Aytarlıq joq balam jeńisten basqa,Qolıńdı ber shın haqıyqat joldasqa,Dushpanıńa miyrimsiz bol, perzentim.

Ulgili isińiz kúndiz de, keshte,Erligiń turadı máńgilik este,Ózińdi tanıtıp ullı gúreste,Sıylıqlanıp, quwanıp kel, perzentim.

Dushpannıń ızasın shıǵarmay yadtan,Fashistlerdi qıyratıp kel fronttan,Jaralǵanday kúshiń gáwhar polattan,Tuwǵan eldiń qorǵanı bol, perzentim.

Qaytpaytuǵın er júrekli batır bol,Dushpannıń qamalın buzıp qolma-qol,Meniń saǵan aytar násiyhatım sol,Doslarıńa qáwender bol, perzentim.

Kúshleriń minásip qáddi boyıńa,Jaslarım tez jeter maqset, oyıńa,Tayarlandıq balam jeńis toyıńa,Abıroy alıp, er bolıp kel, perzentim.