Hal-jaǵday sorasań saǵan dos bolar,Kúler júzi, sózi shiyrin, bos bolar,Qushaq ashıp oǵan kewiliń xosh bolar,Sońında ızası bardur shuǵıldıń.
Seni kúnleydi de ishi janadı,Joq jerińnen túrli qıyaw tabadı,Tez qurtıwdıń jolın izlep baǵadı,Uyalmastay júzi bardur shuǵıldıń.
Ziyandı oylaydı kelse qolınan,Sum kóz benen shar tárepti sholıǵan,Bir qırshıp tewip alıp júrgen jolınan,Qılwasınan xalıq biyzardur shuǵıldıń.
Awızı gójedey qaynap júredi,Múláyım adamdı paylap júredi,Shetletip, qaǵıtıp oynap júredi,Biyorın házili bardur shuǵıldıń.
Miyman bolıp kelip nanıńdı jeydi,Oy bawırıńa kirip, barıńdı jeydi,Úyińnen shıqqan son janıńdı jeydi,Qastiyanlıq isi bardur shuǵıldıń.
Bir sózińdi ekew etip jetkerer,Doslar arasına sóytip ot berer,Kim paydalı bolsa soǵan kóp keler,Toymas kóz qumarı bardur shuǵıldıń.
Aspandaǵı ayǵa qolın sozadı,Ishi kúyip hám arqası qozadı,Yar dostınıń xojalıǵın buzadı,Qıyanetshiligi bardur shuǵıldıń.
Qara basın oylap jılmıń qaǵadı,Hár kúni tawsılmas mıljıń tabadı,Óz paydası ushın attay shabadı,Ózinshe bir kári bardur shuǵıldıń.
Kóptiń tabısınan bayıp júredi,Tek turmas, birewdi sayıp júredi,Tum-tusqa záhárin jayıp júredi,Turpayılıq oyı bardur shuǵıldıń.
Ózin qaralamas, bótende qastı,Qatarın serlemes, gózleydi bastı,Qızǵanshaqlıq penen aǵartar shashtı,Ishten tınǵan halı bardur shufǵıldıń.
Birew isi menen kórinse kózge,Bas qosıp jamanlap shıǵarmas júzge,Onıń hesh jaqsılıq isi joq ózge,Jalaqorlıq jaǵı bardur shuǵıldıń.
Sál nárseni kórse shawlap ketedi,Tozańday tutasıp lawlap ketedi,Ornınan tússin dep talap etedi,Jaman qásiyeti bardur shuǵıldıń.
Hesh qanday kórmeydi jaqsı-jaǵıńdı,Dım sirá bilmeydi doslıq ǵamıńdı,Tırnap sóylep keltiredi arıńdı,Adam bolmas jırı bardur shuǵıldıń.
Izin oylamastan sırtıńnan satar,Sóytip jábir kórseń qızıqqa batar,Nahaqtan jandırıp bálege shatar,Domalaq arzası bardur shuǵıldıń.
Birewdiń isine qolın suǵadı,Jalaqlap, jalbırap basın tıǵadı,Keyninen ókpedey qalqıp shıǵadı,Kewlinde sumlıǵı bardur shuǵıldıńn.