Janday jaqsı kóretuǵın bir inim,Jalt etip dúnyadan ótti de ketti.Bir úyir jılqıday joyıtqan qulının,Jurttıń qabırǵasın sótti de ketti.

Ańsat is pe qanatıńnan qayrılıw,Salıń suwǵa ketip turar bundayda.Oylaysań: bir jas jigitten ayrılıw,Ózi az xalıqqa kóplik qılmay ma?

Ay, sóytse de, qoyaber bul insandı,Bul dárt birewlerge jetpepti ele.Qıyalların qıyal shırmap mıń sanlı,Kókireklerden shaytan ketpepti ele...

Suwımay atırıp marhum topıraǵı,Onıń lawazımın soraptı birew.Túspey turıp basqalardıń soqpaǵı,Túrli aw-duzaqtı quraptı birew.

— Haw, onıń jetisi, ele qırqı bar? —Dese de, ol adam aspaptı qulaq.«óliniń de, hámeldiń de nırqı bar,Ayta ǵoysa» — depti et-betten qulap.

.. Onnan soń bilmedim ne boldı izi,Esittim: biyshara ókireń qaǵıp júr.Qápelimde, túnge dónip kúndizi,At salıp hár jaqtan aǵa tawıp júr.

Áy, qudayım, yar bol usı jigitke,Abaysızda mákiriw jerdi baspaǵay.Bir sózim bar tıńlar degen úmitte,Meyli qulaq assın, meyli aspaǵay:

Bes kúnlik ómirińdi ótker sen xosh waq,Dúnyaǵa biz emes, qonaq keledi.Ólgenniń orının sorama hesh waq,Seniń ornıńdı da sorap keledi.