SOQPAQ

Kishkene bir ayaq soqpaq bar,Biziń úyden shıqqan baslanıp,Qıyalımdı biylep-aq alıp,Sol bir soqpaq bárhama tartar.

Zulım dushpan suqqanda qolın,Gúllep ósken Watan-anama,Arım qaynap, sıymay xanama,Sol jol edi jollanǵan jolım.

Hátte, Moskvaǵa jańadan,Júrgenimde bilim alsam dep,Usı ǵana soqpaq penen tek,Shıqtım úyden tutıp chemodan.

Usı soqpaq úlkeyip kem-kem,Qosıladı uzın keń jolǵa,«Álipbem»di kóterip qolǵa,Mektepke de sonnan bardım men.

Jawdı jeńip biz qaytqan waqta,Kútip alıp meniń jolımdı,Súygen edi anam qolımdı,Basqa emes, tap sol soqpaqta.

Basqa emes, tap sol soqpaqta.Meniń ushın bahası artıq,Keregimdi ruwxım artıp,Usı soqpaq arqalı taptım.