Kórip tamasha qılıńız,Ne ájayıp palўan keldi,Kelse babasın bilgińiz,Jurt aǵası Amangeldi.
Amangeldi jurt aǵası,Miyankóldiń toqsabası,Mırza Polatdur babası,Atı shıqqan Amangeldi,
Asan atalıq bolǵanda,Miyankóldi soraǵanda,Onı dushpan óltirgende,Qanın alǵan Amangeldi.
Asan sonda Miyankólde,Neshe dushpan bardı onda,Kóp qoldawlı Túrkstanda,Soǵan bardı Amangeldi.
Barıp dushpandı keltirdi,Gellesin kesip keltirdi,Mártligin jurtqa bildirdi,Arıslan tuwǵan Amangeldi.
— Berdaq - Tańlamalı shıǵarmalarınıń jıynaǵı
Ashamaylı hám Sandawlı,Qostamǵalı hám Qoldawlı,Qoldawlı tórt ata ulı,Jaqsısıdur Amangeldi.
Ámirdiń atı Muzappar,Hám Tahirxan, Miyirhaydar,Shamurat wallami Dániyar,Barıp kórdi Amangeldi.
Qoqan xanı qıldı zorlıq,Qız soratıp berdi xorlıq,Asan kórsetti duǵımlıq,"Jılatpayman eldi" – dedi.
-Qaraqalpaq bermes qızın,Hámmesi de meniń qozım,Tiydirmespen tiride ózim, -Dep Asan er Qoqan keldi.
Sózinen qaytpadı Asan,-Qız alarsań ólsem qashan,Watan bolmas bizge Qoqan,Sen shuwlattıń eldi, - dedi.
Xan Asandı kóp urǵızdı,Jáne ornınan turǵızdı,-Bermeyseń be – dedi – qızdı?Asan jáne sózge keldi.
Astırdı darǵa Asandı,El dep Asan berdi jandı,Sonı qurtqan zalım xandı,Gelle qıldı Amangeldi.
Amangeldidey bolmaǵa,Barıp xannan qan almaǵa,Gellege kesip, jan almaǵa,Qay birińniń shamań keldi.
Qaytpadı bekten hám xannan,Kesherler shiyrin janınan,Amangeldiniń qolınanQutılmaǵı gúman boldı...
...Urısqanın kórseń anıń,Qatesi joq bul dástannıń,Qarsı kelgen ol dushpannıń,Júreginde árman keldi.
Patshalar turǵan taxtında,Onıń dáwletli baxtında,Amangeldiniń waqtındaNeshshe xannan inam keldi.
Ol Buxarı, Ǵıjduwannan,Qashqarı, Tashkent, Qoqannan,Ándijanı, Marǵulannan,Tárk bolmayın dawam keldi.
Amangeldi dáwletinde,Bárekella xızmetine,Hár bir jurttan húrmetineTúrli-túrli inam keldi.
Ózi ozǵan ǵardashınan,Ketpes dáwleti basınan,Ol Buxardıń patshasınan,Jarlıq móhri nıshan keldi.
Dóremes onıńday adam,Bul sózdi ne bilsin nadan?Olar hám ótti dúnyadan,Neshshe túrli zaman keldi.
Jetisti allaǵa dadı,Qoldawlıdur haslı-zadı,Mırza Polattıń zúryadı,Arıslan edi Amangeldi.