Eken

Jigitlik degen nar eken,Ǵarrılıq degen jar eken,Qartayǵan soń jasıń jetip,Keń dúnya saǵan tar eken.

Bilgir sózi wásiyatdur,Yaqshılardan sharafatdur,Ǵarrı sózi násiyatdur,Bilmegenler nadan eken.

Bilgenlerdi tıńlamaǵan,Gáp mánisin ańlamaǵan,Úlkennen násiyat almaǵan,Aqılsızlıq bolǵan eken.

Sálem bermey ǵarrılarǵa,Hazar berip paqırlarǵa,Aların qaraw olarǵa,Biyinsaplıq bolǵan eken.

Dúnyası biyhesap erdi,Jeti dúrkin jılqı jıydı,Qarun dúnyada ne kórdi?Dúnya sońı wayran eken.

Bul dúnyaǵa kewil bergen,Ólmeymen dep ǵapıl júrgen,Jeti ıqlımǵa húkim súrgen,Iskender ne bolǵan eken?

Jarlınıń kórer kúni joq,Ústine kiyer tonı joq,Búlbildiń qonar gúli joq,Gúl dep shatqa qonǵan eken.

Qarap bolǵan eken kúnim,Sóyley almay óshti únim,Jarlıǵa bolmay bir tınım,Bir tamaq dep jortqan eken.

Juwırıp-jortıp tamaq tappay,Tamaq tapsa ústin jappay,Kúndiz júrip, aqsham jatpay,Táǵdir usılay bolǵan eken.

Sózlerim dáryaday tastı,Búlbil sayrap jolǵa tústi,Bizge taǵdir qılǵan isti,Tadbil qılmaq yalǵan eken.

Heshkim názer salmas bizge,Aytıp turman, xalqım, sizge,Bul sózdi qaldırdım izge,Kóp sóz zaya ketken eken.

Keler me eken bizge murat,Isimizdi alla ońlap,Usı jerde Berdimurat,Sózin tamam qılǵan eken.