Ernazar biy

Áwel Aydos baba ólip,Ornın tuttı Ernazar biy,Qaraqalpaqqa aǵa bolıp,Húkim etti Ernazar biy.

Qaraqalpaqqa aǵa bolıp,Suńqar salıp, bedew minip,Kewline kelgenin qılıp,Bolıp ótti Ernazar biy.

Qıpshaq yalǵannan dawa qıldı,Dóhmetten moynına qun saldı,Bir qalmaq jasawıl boldı,Pul bermedi Ernazar biy.

Japtı jalǵannan jalasın,Bilip aǵzınıń alası,Qarlı qalpaqtıń balası,Qılıshladı Ernazar biy.

Xan gúnakar qılǵanıńda,Biyligini alǵanıńda,Hám aq úyli bolǵanıńda,Muńaymadı Ernazar biy.

-Meni heshkim tilemesin,Jalınıp sorap júrmesin,Men ólgende jılamasın-Dedi arıslan Ernazar biy.

Wáyis bayǵa zorlıq qıldı,Qılıshın alıp oqtaldı,Gúllan xiywalı toqtaldı,Qahárin jaydı Ernazar biy.

Sawash kúni ılǵal taslap,Sárdar bolıp, jıyın baslap,Janǵazı xandı qılıshlap,Soyqan saldı Ernazar biy.

Burınǵı biylik súrisin,Burınǵı júris-turısın,Xanǵa sálemge kirisin,Kemitpedi Ernazar biy.

Biy basına bir qus saldı,Quslap shıqpaǵa dus bardı,Xojeke qussız bos qaldı,Qus bermedi Ernazar biy.

Xan háziretke sálem qıldı,Hár qaysısı sarpay aldı,Xojakeń sarpaydan qaldı,Arız ettirdi Ernazar biy.

-Xojeke aytar arzım bar,Neshshe qus sizden qarzım bar,Qalıs sarpay beriw dárkar, -Dedi arıslan Ernazar biy.

Xan házireti: "meter!" dedi,"Bejit ornıńnan tur!" dedi,"Uǵlana sarpay ber" dedi,Qullıq qıldı Ernazar biy.

"Xosh bolǵay" dep meter turdı,Ǵaziynege qadem urdı,Meter menen birge júrdi,Arıslan tuwǵan Ernazar biy.

Meter barıp esik ashtı,Hár túrli gáplerge qashtı,Bir shekpenge talastı,Qol uzattı Ernazar biy.

Meter turıp sóz basladı,Látte shapannan usladı,Hár túrli sarpay tasladı,Jaratpadı Ernazar biy.

Meter turıp gúrrińlesti,Hár túrli gápten sóylesti,Bir shekpenge kózi tústi,Qol uzattı Ernazar biy.

Tanıp tur eken hasıldı,Meter shekpenge asıldı,Jıyılǵan sarpay shashıldı,Jibermedi Ernazar biy.

Shekpenge asıldı meter,Biy zor berdi onnan beter,-Tart qolıńdı, gelleń keter!-Dedi arıslan Ernazar biy...

-Xanǵa málim shekpen, -dedi,Kóp pul menen pitken, - dedi,Naǵıp inam etken? – dedi,Esitpedi Ernazar biy,

-Házireti Palўandur piri,Yad eterler óli-tiri,Biz hám xannıń bir wáziyri,Beriń! – dedi Ernazar biy.

-Sózim hadaldur, haram joq,Xannıń ózine sharam joq,Al saǵan berer param joq,Kimseń? – dedi Ernazar biy.

Biylik súrdi jeti pushtı,Kim qılıpdur munday isti?Meterdiń zárresi ushtı,Aybat etti Ernazar biy.

Jaratqan kún bilán aydı,Yad etińiz bir qudaydı,Alıp shıqtı Ernazar biy.

Munnan soń Xojeli keldi,Kóp kemede keńes qıldı,Qaraqalpaqtı jıynap aldı,Arıslan tuwǵan Ernazar biy.

Bárshe jám bolıp otırdı,Ǵaziynege zer toltırdı,Zarlıq tóreni keltirdi,Xan kóterdi Ernazar biy.

Bárshe xızmetke shaq boldı,Belinde aq pıshaq boldı,Begler begi inam boldı,Bárin jıydı Ernazar biy.

Qazı-kálan, shayqul-islam,Hám náhip izzeti ikram,Bárshe turıp qıldı sálam,Húkim etti Ernazar biy...

...Kemeden aldı ireńdi,Xan etti Zarlıq tóreńdi,Asıp Qutlımurat gereńdi,Zorlıq etti Ernazar biy.

Dushmanına sawda saldı,Toǵız ushan ǵaziyne aldı,Kisi asıp, qusbegi boldı,Arıslan tuwǵan Ernazar biy.

Yaўmıt shaqırdı kelsin dep,Kelip Góneni alsın dep,Máslahat bunda bolsın dep,-Barmań, -dedi Ernazar biy.

Aytsa qaralpaq qılmadı,"Barmań" dese til almadı,Kópshilikten bul qalmadı,Birge bardı Ernazar biy.

Yawmıttan ılǵal keltirdi,Jaqpaǵanların óltirdi,Erligin jurtqa bildirdi,Jalǵız ózi Ernazar biy.

Biyleri másláhát etti,Zarlıq xandı alıp ketti,Xiywa xanın xoshwaq etti,Xansız qaldı Ernazar biy.

Xiyўalı tókti qızıldı,Bul sózdiń izi úzildi,Biyler baslap jurt buzıldı,Ǵapıl qaldı Ernazar biy.

Arallı, qalpaq qırq mıń úyli,Gáhi jılap, gáhi kúydi,"Alma jegen alpıs biydi,Kórey", - dedi Ernazar biy.

Biyler qashtı basın baǵıp,Shiyrin janın otqa jaǵıp,Qalanıń ústine shıǵıp,Kútip turdı Ernazar biy.

Biyler anda kele almadı,Óley dese óle almadı,Bar dese heshkim til almadı,Ǵazep etti Ernazar biy.

Qaraqalpaq aytqan sózi,Hasla kelispedi izi,Xorezmde jalǵız ózi,Erlik qıldı Ernazar biy.

Qalǵanlardı jıynap aldı,Izlim jolǵa qala saldı,Qudaǵa táwekel qıldı,Mártlik penen Ernazar biy.

Jasawıl bası hám keldi,Arallı, qalpaq jám boldı,Arbalı kóshi qamaldı,Jekke qaldı Ernazar biy.

Iyshan keldi el qılmaǵa,Arada elshi bolmaǵa,Jurttıń sawabın almaǵa,Hayran boldı Ernazar biy.

"Siz ólseńiz sheyit", -dedi,"Ókpe-giyneńdi ayt", -dedi,"Endi ıraydan qayt", -dedi,-Qaytpań, -dedi Ernazar biy.

-Qutlımurat, Qabıl ekewi,Júsipbay menen úshewi,Ámet, Palўan hám besewi,Shıqsın! –dedi Ernazar biy.

Aldı-artına qaramadı,Hal-awhalın soramadı,Biyler ana jaramadı,Qaytıp ketti Ernazar biy.

Batırlıqta taqlıǵınan,Awız birlik joqlıǵınan,Biylerdiń qorqaqlıǵınan,Ǵapıl boldı Ernazar biy.

Góruǵlı bektey er edi,Qatarda qosa nar edi,Tolı jurtqa dárkar edi,Sheyit óldi Ernazar biy.