Muraplar aldı tillanı,Mollalar ayttı ollanı,Qazbay jıldaǵı salmanı,Suw tamtarıs boldı bıyıl.
Suw kelmedi kók shıqqanda,Átshók quslar shaqırǵanda,Japlarǵa shıǵır qurǵanda,Suw tartılıp qaldı bıyıl.
Júz ótkende egin ektik,Qarıq jarıp qawın tiktik,Aqırı iyt túynek jedik,Jamanlıqqa tústi bıyıl.
Suw kelmedi atızlarǵa,Áspek boldı kúshi barǵa,Aqsaq murap – qara qarǵa,Biyler menen júrdi bıyıl.
Jerlerimiz boldı ayaq,Áspekti ashsaq jedik tayaq,Murap bolıp óńsheń sayaq,Quralaqan qaldıq bıyıl.
— Berdaq - Tańlamalı shıǵarmalarınıń jıynaǵı
Bolmadı heshkimim juwıq,Eginlerdi urdı suwıq,Basalamay iship, ashıdı quwıq,Jaman ashlıq boldı bıyıl.
Ashtan óldi neshshe adam,Suwıqqa da bermey shıdam,Ashlıq boldı ketpey mudam,Onnandaǵı ótti bıyıl.
Qoyan jılı jaqınladı,Jılqı jılda xalıq shuwladı.Qorqıp júregim suwladı,Sonday qıyın boldı bıyıl.
Shegirtke jedi arpanı,Qaldı tozańǵıp topanı,Ayırıp kelip qopanı,Qaban da jaw boldı bıyıl.
Aman qoymay usı halǵa,Kóp adamdı salıp jolǵa,Qazıwǵa aydadı bárha,Súrginshilik boldı bıyıl.
Bardıq qazıwǵa azıqsız,Jedik tayaqtı jazıqsız,Baylawda turdıq qazıqsız,Qazıw awır boldı bıyıl.
Ílaydı aldı shaqqanı,Tawsılıp kimniń taqanı,Tiydi muraptıń baqanı,Qazıw qıyın boldı bıyıl.
Adamlar júr jalań ayaq,Halı onıń qalay bolmaq?Murap sonda urdı tayaq,Jaman isler boldı bıyıl.
Solay bolıp istiń jóni,Qozǵalmay, shıqpay úni,Birazlardıń qalıp kóni,Ólgenler kóp boldı bıyıl.